Almatyda erekshe qajettiligi bar turǵyndar qala basshysy Erbolat Dosaevtyń tapsyrmasy sheńberinde biliktiligin arttyryp, eńbek utqyrlyǵy ortalyǵy arqyly oqýdan ótýge múmkindik alady.
Sondaı-aq olarǵa «Ten Qogam» ortalyqtary arqyly kásiptik terapıa men kásibı daǵdylardy damytý boıynsha qyzmetter qoljetimdi bolady, dep habarlaıdy Almaty-akshamy.kz
Bul týraly Almaty qalasy ákiminiń orynbasary Ásem Núsipova Almaty qalasynyń Inklúzıvti ortany damytý jónindegi keńestiń birinshi otyrysynda habarlady.
«2023 jyly Eńbek utqyrlyǵy ortalyǵyna erekshe qajettiligi bar 2860 azamat júginip, 1965 adam jumyspen qamtyldy. Bul rette 244 adam turaqty jumys oryndaryna, 502 adam áleýmettik jumys oryndaryna, 661 adam «Bastaý bıznes» baǵdarlamasy boıynsha oqýǵa jiberildi», — dep atap ótti Ásem Núsipova.
Onyń aıtýynsha, bıyl jyl basynan beri Eńbek utqyrlyǵy ortalyǵyna erekshe qajettiligi bar 993 azamat júgingen. 533 adam jumyspen qamtý sharalarymen qamtylsa, al 2024 jyldyń sońyna deıin jumyspen qamtý sharalarymen keminde 2,2 myń adamdy qamtý josparda bar.
«Bizdiń basty mindetimiz – azamattardyń ózin-ózi tanýy, eńbegi úshin materıaldyq syıaqy alýy úshin yntalandyrýlar jasaý jáne, tıisinshe, olardyń ómir súrý sapasyn arttyrý. Bul jalaqynyń keminde 70%-y sýbsıdıalaý arqyly, sondaı-aq jumys berýshilerdiń arnaıy jumys oryndaryn jabdyqtaýǵa arnalǵan jabdyqtardy satyp alýǵa jáne ornatýǵa jumsaǵan shyǵyndaryn óteý arqyly júzege asyrylady», — dedi Almaty qalasy ákiminiń orynbasary.
Aıta keteıik, Eńbek utqyrlyǵy ortalyǵy arnaıy jumys oryndaryn jabdyqtaýǵa arnalǵan jabdyqtardy satyp alý jáne ornatý shyǵyndaryn óteýdi júzege asyrady. Bul jumys berýshilerge erekshe qajettiligi bar adamdardy jumysqa jaldaýǵa kóbirek múmkindik beredi.