Almatydaǵy kólderdiń birinde er adam batpaqqa bata jazdady. Oǵan qutqarýshylar der kezinde kómek kórsetti, - dep habarlaıdy Aqshamnews.kz tilshisi.
Oqıǵa Túrksib aýdanynda, Maılın kóshesindegi kólde bolǵan.
"Er adam batpaqty jerde qalyp qoıǵany týraly habarlama Almaty qalasy TJD-ne tústi. Qutqarý operasıasyn júrgizý úshin QR TJM Respýblıkalyq jedel-qutqarý jasaǵynyń (ROSO) jedel toby oqıǵa ornyna attandy. Kelgen qutqarýshylar er adamnyń ózdiginen batpaqtan shyǵa almaı qalǵanyn anyqtap, dereý áreket etti", – dedi mınıstrliktegiler.
Zardap shekken er adam batpaqtan shyǵarylyp, polısıa qyzmetkerlerine tapsyryldy.
Buǵan deıin almatylyq qutqarýshylar 12 qabatty úıdiń besinshi qabatynda kondısıonerdiń syrtqy blogynyń kronshteınine ilinip qalǵan áıeldi qutqarǵan edi.