Qazaqstanda 18 jasqa deıingi balalar MÁMS júıesinde memleket tarapynan saqtandyrylǵan.
Almatyda №2 qalalyq klınıkalyq balalar aýrýhanasynda alǵash ret epılepsıanyń aýyr túrine shaldyqqan balalarǵa operasıa jasaldy, dep habarlaıdy Almaty-akshamy.kz.
Aýrýhananyń baspasóz qyzmeti málim etkendeı, 2023 jyldyń 13 qańtary men 16 qańtary aralyǵynda №2 qalalyq klınıkalyq balalar aýrýhanasynda álemge áıgili neırohırýrg, germanıalyq profesor Ýlrıh Tomaleniń qatysýymen balalar neırohırýrgıasy boıynsha «Dárige tózimdi epılepsıamen aýyratyn balalardaǵy az ınvazıvti fýnksıonaldy gemısferotomıa» atty biregeı sheberlik sabaǵy ótti.
Sonyń aıasynda nemis mamany jetekshi qazaqstandyq neırohırýrgtermen birlesip epılepsıanyń kúrdeli túrine bes ota jasady.
«Bizdiń bes kishkentaı balamyzǵa ota jasaldy. Berlındegi «Sharıte» klınıkasynan kelgen qonaǵymyz, profesor Tamaleniń jetekshiligimen sheberlik sabaǵy barysynda epılepsıamen aýyratyn balalarǵa kúrdeli operasıalar júrgizildi. Barlyq operasıa sátti ótti, balalar qazir neırohırýrgıa bólimshesinde jatyr. Budan bylaı mundaı balalarǵa óz betimizshe operasıa jasaımyz dep oılaımyn»,- dedi №2 qalalyq klınıkalyq balalar aýrýhanasynyń bas dárigeri Marat Rabandıarov.
Sońǵy jyldary epılepsıa hırýrgıasy boıynsha jańa tehnologıalar engizilýde. Olar buryn mundaı emdelý múmkin bolmaǵan naýqastardyń saýyǵyp ketýine múmkindik beredi.
Profesor atap ótkendeı, mıkrohırýrgıalyq az ınvazıvti ádistemeni qoldaný boıynsha osy hırýrgıalyq aralasýlar kezinde kompúterlik assıstensıa mindetti túrde qoldanylady.
«Berlınde biz ózimiz bul ádisti «3D-shyndyq» neıronavıgasıalyq júıesi arqyly engizýdi jaqynda ǵana bastadyq. Bul zamanaýı tehnologıa osy qazaqstandyq klınıkada paıda bolǵandyqtan, biz osy ádisti Qazaqstanda birge engizýdi uıǵardyq. Aıta ketý kerek, balalar aýrýhanasynyń operasıalyq bólmesi joǵary deńgeıli, zamanaýı medısınalyq tehnıkamen jabdyqtalǵan. Ári qaraı únemi damyp, tehnıkany da, jańa ádisterdi de jetildirý óte mańyzdy», - dedi nemis dárigeri.
Aıta keteıik, ota mindetti áleýmettik medısınalyq saqtandyrý aıasynda tegin jasaldy.
Esterińizge sala keteıik, Qazaqstanda 18 jasqa deıingi balalar MÁMS júıesinde memleket tarapynan saqtandyrylǵan.