ALMATYDA ENERGO UNIVERSITY-DE ANHALT QOLDANBALY ǴYLYMDAR ÝNIVERSITETİNİŃ FILIALY ASHYLDY
18 qyrkúıekte Almatyda Energo University (Ǵumarbek Dáýkeev atyndaǵy Almaty energetıka jáne baılanys ýnıversıteti) bazasynda Anhalt qoldanbaly ǵylymdar ýnıversıtetiniń fılıalynyń ashylý saltanaty ótti, dep habarlaıdy aqshamnews.kz
İs-sharaǵa Germanıanyń Almatydaǵy Bas konsýly Mattıas Kısler, Anhalt ýnıversıtetiniń prezıdenti Iorg Bagdan, Energo University rektory Ǵanı Nyǵymetov, Anhalt ýnıversıtetiniń Almatydaǵy fılıalynyń dırektory Edýard Sımens jáne Germanıa ǵylym qorynyń ókilderi qatysty.
Anhalt qoldanbaly ǵylymdar ýnıversıteti Qazaqstanda nemis bilim berý baǵdarlamalary boıynsha oqytatyn jáne nemis úlgisindegi dıplomdar beretin alǵashqy nemis joǵary oqý orny boldy. Jańa fılıalda oqytý aǵylshyn tilinde kelesi mamandyqtar boıynsha júrgiziledi: jańartylatyn energıa, júıelik ınjenerıa, bıotehnıkalyq jáne medısınalyq júıeler men apparattar, energetıkalyq saıasat jáne halyqaralyq saýda.
Alǵashqy 30 stýdent bıylǵy jyly memlekettik granttar men aqyly negizde oqýdy bastaıdy dep josparlanýda. Jaqyn arada granttyq qarjylandyrýdyń kóbeıýi kútilýde, bul qazaqstandyq stýdentterdiń kóbirek sanyna sapaly ınjenerlik bilim alyp, eki birdeı dıplom – otandyq jáne eýropalyq úlgidegi dıplomdardy alýyna múmkindik beredi.
Fılıalda oqý barysynda stýdentterge nemis tilinen qarqyndy kýrstar ótkiziledi, bul olarǵa oqýdyń bir bóligin jáne óndiristik tájirıbeni Germanıada ótýge múmkindik beredi.
«Fılıaldyń túlekteri Qazaqstanda da, Germanıa men basqa da eýropalyq elderde de kásibı qyzmetin júzege asyrý úshin keń múmkindikterge ıe bolady», - dep atap ótti Anhalt ýnıversıtetiniń prezıdenti Iorg Bagdan.
Bastapqyda fılıalda oqytýdy nemis oqytýshylary júrgizedi. Biliktilikti keshendi arttyrý baǵdarlamasynan keıin qazaqstandyq áriptesteri birtindep oqytýdy óz qoldaryna alady. Energo University-diń alǵashqy bes oqytýshysy qazirdiń ózinde Anhalt ýnıversıtetinde taǵylymdamadan ótýde. Kelesi jyldyń sáýir aıynda taǵy on oqytýshy Germanıaǵa bir jyldyq biliktilikti arttyrý kýrsyna barýdy josparlap otyr.
«Bizdiń ýnıversıtet pen Anhalt qoldanbaly ǵylymdar ýnıversıtetiniń arasynda uzaq ýaqyttan beri seriktestik qatynastar bar. Fılıal ashylǵanǵa deıin biz birlesip bes qos dıplomdy baǵdarlamany sátti ázirlep, iske qostyq. Búgingi oqıǵa osy qatynastardyń zańdy jalǵasy boldy. Germanıanyń jetekshi tehnıkalyq ýnıversıtetteriniń birimen seriktestik elimizdiń ekonomıkasy úshin sapaly mamandardy daıarlaýǵa, sondaı-aq olardyń jahandyq naryqta básekege qabiletti bolýyna yqpal etedi dep senemiz», - dep atap ótti Energo University rektory Ǵanı Nyǵymetov.
Buǵan deıin QR Ǵylym jáne joǵary bilim mınıstri Saıasat Nurbek atap ótkendeı: «Anhalt ýnıversıteti energetıka jáne telekomýnıkasıa salasyndaǵy sarapshy retinde Qazaqstanda ashylyp jatqan sheteldik joǵary oqý oryndarynyń jalpy tobynda mańyzdy ról atqarady. Biz bul nemis ýnıversıtetiniń ónerkásiptik kompanıalarmen yntymaqtastyq ornatý tájirıbesin sanaly túrde paıdalanǵymyz keledi jáne sol arqyly olardy da Qazaqstanǵa tartyp, sala kóshbasshylaryn biriktirýdi kózdeımiz».