Almaty qalasynyń ákimi Darhan Satybaldynyń tóraǵalyǵymen ótken alqaly jıynda elektrondyq saýdanyń qazirgi jaı-kúıi men onyń damytý baǵyttary talqylandy. Basqosýda Almatyny Qazaqstan men Ortalyq Azıadaǵy elektrondyq komersıanyń basty ortalyǵy retinde rólin nyǵaıtý máselesine basa nazar aýdaryldy.
Qalalyq kásipkerlik jáne ınvestısıalar basqarmasynyń málimetinshe, 2024 jyldyń qorytyndysy boıynsha Almatydaǵy elektrondyq saýda kólemi 5,3 trln teńge bolǵan. Bul kórsetkish ótken jylmen salystyrǵanda 42% joǵary. Onyń ishinde 3 trln teńgesi taýarlardyń bólshek saýdasyna, 2,3 trln teńge onlaın qyzmet kórsetýge tıesili. Osylaısha, Almatynyń respýblıka boıynsha onlaın saýdadaǵy úlesi 90%-dan asyp otyr.
Almatyda 1500-den astam belsendi elektrondyq komersıa sýbektisi jumys isteıdi, bul el aýmaǵynda tirkelgenderdiń shamamen jartysy. Negizgi baǵyttarǵa kúndelikti tutynatyn taýarlar, tehnıka, kıim-keshek, kosmetıka, sondaı-aq, jetkizý, kólik jáne brondaý salalaryndaǵy qyzmetter jatady.
Mańyzdy baǵyttardyń biri logıstıka jáne qoıma ınfraqurylymyn damytý. Qalada elektrondyq saýdaǵa beıimdelgen taratý ortalyqtary iske qosylyp, iri logıstıkalyq nysandardyń qurylysy qurylysy qarqyn alyp keledi. Bul óz kezeginde jańa jumys oryndarynyń ashylýyna, onlaın tapsyrys qabyldaý men jetkizý jyldamdyǵyn arttyrýǵa múmkindik beredi.
Kezdesý barysynda qala bazarlardy jańǵyrtý elektrondyq saýda júıesiniń qosymsha elementi retinde qaraldy. Almatydaǵy 59 bazardyń 41-i jańartýdan ótken. Bul nysandarda sıfrlyq saýda júıesi engizilip, turaqty ınternet jelisi tartylyp, saqtaý, logıstıka jáne qolma-qol aqshasyz tólem aımaqtary júıelenip keledi. 10 myńnan astam satýshy dástúrli saýda tásilin onlaın formatpen sátti ushtastyryp otyr.
Sonymen qatar shaǵyn jáne orta bıznesti qoldaý sharalary talqylandy. Shaharda sıfrlyq daǵdyny damytý, halyqaralyq platformalarmen jumys isteýdi úıretý jáne onlaın arnalar arqyly shıkizattyq emes ónimdi eksporttaýǵa baǵyttalǵan bilim jáne keńes berý baǵdarlamalary júzege asyrylyp otyr.
Keńes sońynda qala basshysy Darhan Satybaldy ınfraqurylymdyq jobalardy júzege asyrýdy jedeldetýdi, sıfrlandyrý isin keńeıtýdi jáne onlaın platformalarmen seriktestikti kúsheıtýdi tapsyrdy. Josparǵa saı, 2025 jyldyń sońyna qaraı Almatydaǵy elektrondyq bólshek saýda kólemi 3,5 trln teńgege jetip, al 2030 jylǵa qaraı bólshek saýda aınalymyndaǵy elektrondyq saýdanyń úlesi 50%-dan kem bolmaıdy degen úmit bar.