Almatyda qoǵamdyq kólikti jańartý jáne ekologıalyq jaǵdaıdy jaqsartý jumystary jalǵasýda. Qalalyq mobıldilik basqarmasy jańa baǵyt ashyp, ony elektroavtobýstarmen qamtamasyz etpek.
№90 baǵyttaǵy avtobýs Abaı dańǵyly boıymen – K.Medeýbekov kóshesinen Respýblıka saraıyna deıin qatynaıdy. Bul jańa baǵyt Naýryzbaı aýdanyndaǵy Qalqaman jáne Shuǵyla shaǵynaýdandary turǵyndarynyń qatynasyn jeńildetedi.
Baǵytta uzyndyǵy 12 metrlik «Golden Dragon» markaly elektroavtobýstar qyzmet kórsetedi. Olar dybyssyz júrip, salqyndatqyshtarmen, beınebaqylaý kameralarymen, USB-uıashyqtarymen, júrgizýshini qadaǵalaý júıelerimen jáne ózge de zamanaýı quraldarmen jabdyqtalǵan.
Jolaýshylardy «Almatyelektrotrans» komýnaldyq kásiporny tasymaldaıdy. Kún saıyn jolǵa 25 avtobýs shyǵyp, qozǵalys aralyǵy 4 mınýtty quraıdy. Jańa baǵyt 2 qyrkúıekten bastap jumys isteıdi.