Birikken Ulttar Uıymy ár memlekettiń halyq sanynyń sharyqtaý shegi qaı kezeńderge tuspa-tus keletini týraly boljam jasady.
Bul jaıynda islam.kz portaly BUU saıtyna silteme jasaı otyryp málim etken, dep habarlaıdy aqshamnews.kz.
«Álem turǵyndarynyń keleshegi» atty baıandamadaǵy málimetterge qaraǵanda, adamzattyń tórtten birinen kóbi halyq sany azaıyp kele jatqan elderde turady. Máselen, ótken jyly Qytaı, Germanıa, Japonıa jáne Reseı halqynyń sany óziniń sharyqtaý shegine jetken.
Demografıalyq boljam boıynsha bıyl 48 elde halyq sany sharyqtaý shegine jetpek. Bul elderdegi halyq sany adamzattyń 10 %-n quraıtyn bolady. 2054 jylǵa deıin Úndistanda, Pákistanda, Nıgerıada jáne Amerıka qurama shtattarynda, sondaı-aq, 126 elde halyq sany ósetin bolady. AQSH, Kanada, Fransıa jáne Ulybrıtanıa sıaqty elderde halyq sany kóshi-qon (mıgranttar) esebinen ósedi, al týýdyń joǵary kórsetkishi men neǵurlym jas demografıalyq qurylym Angolada, Somalı men Nıgerde halyq sanynyń ósýine yqpal etetin negizgi faktorǵa aınalady. Al Pákistan men Nıgerıada halyq sany 2100 jyldan keıin de baıaý óspek. Osy oraıda mundaı boljam qazirgi týý koefısıenti, ólim-jitim deńgeıi jáne kóshi-qon sekildi kórsetkishterge negizdelgen. Soǵys, juqpaly indet, ashtyq, klımat daǵdarysy, áleýmettik-ekonomıkalyq ahýaldar, t.b. sekildi týý kórsetkishine sózsiz áser etetin ózge faktorlar bul boljamda eskerilgen joq.