Almatyda jaz aılarynda elektr samokattaryna qatysty jol-kólik oqıǵasy 4 esege artty.
Bul týraly baspasóz máslıhatynda qalalyq polısıa departamentiniń resmı ókili Saltanat Ázirbek aıtty, dep habarlaıdy Almaty-akshamy.kz QazAqparatqa silteme jasap.
Spıkerdiń sózinshe, Almatyda mıkromobıldi kólik quraldaryn paıdalaný boıynsha kúrdeli jaǵdaı qalyptasty.
«Jasyratyny joq, qala turǵyndary mıkromobıldi kólikte jol júrý erejelerin jıi buzady, jaıaý júrginshilerge jáne jol júrisine basqa da qatysýshylarǵa qolaısyzdyq týǵyzady. Statısıka málimeti boıynsha, jaz bastalǵaly atalǵan kóliktermen bolǵan jol apaty 4 esege kóbeıdi, - dedi Almaty qalalyq polısıa departamentiniń resmı ókili.
Saltanat Ázirbektiń aıtýynsha, jol apattarynyń deninde samokat nemese mopedterdi kámeletke tolmaǵan jasóspirimder basqarady.
Qazir elektr samokattarynyń kólik quraly retindegi statýsyn retteıtin standart ázirlendi.
«Jol júrisi týraly» zańǵa ózgerister engizý kózdelgen, onda elektr samokattaryn basqaratyn adamdardyń quqyqtary da, mindetteri de naqty jazylatyn bolady. Sonyń saldarynan ózgerister Jol qozǵalysy erejeleri men QR Ákimshilik quqyq buzýshylyq týraly kodeksine qatysty bolady. Bul – ýaqyt talaby. Bul normalar jol qozǵalysyna qatysýshylar qaýipsizdiginiń kepili bolady»,- dep atap ótti S. Ázirbek.
Elektr samokattaryn jalǵa berý qyzmetin usynatyn kompanıanyń syrtqy baılanystar bóliminiń basshysy Danııl Kapsanyń sózinshe, samokat – qaýipsiz. Alaıda, jaýapsyz júrgizý – qaýipti.
«Talapty buzatyn birinish jaǵdaı – bir samokatta eki adamnyń qozǵalýy. Bul óte qaýipti, óıtkeni is júzinde eki jolaýshy, olardyń jalpy salmaǵyna qaramastan, samokattyń turaqtylyǵy men basqarylýyn edáýir tómendetedi, apat yqtımaldyǵyn arttyrady. Sondyqtan qyzmet kórsetý erejelerinde mundaı saparlarǵa tyıym salynady, aıyppul qarastyrylǵan.
Ekinshi jaǵdaı – jaıaý júrginshiler ótkelinen ótý. Samokattarmen bolatyn jazataıym oqıǵalardyń kópshiligi trotýarlar men avtomobıl joldarynyń qıylysynda oryn alady: ázirge barlyq avtokólik júrgizýshileri jaıaý júrginshiler ótkelinde samokattardyń kenetten paıda bolýyna daǵdylanbaǵan, bul kóbinese jazataıym oqıǵalarǵa ákeledi. Qaýipsizdik maqsatynda árbir adam jaıaý júrginshiler men avtomobıl joldarynyń qıylysynda samokattan túsý kerek.
Talapty buzatyn úshinshi jaǵdaı – samokatqa balalardyń minýi», - dedi ol.