Búgin Almatyda EdUHK jáne QyzPU arasyndaǵy birlesken Kásibı damý ortalyǵynyń saltanatty ashylý rásimi ótti, dep habarlaıdy aqshamnews.kz.
Joba Qazaq ulttyq qyzdar pedagogıkalyq ýnıversıteti, Abaı atyndaǵy Qazaq ulttyq pedagogıkalyq ýnıversıteti jáne Gonkong bilim ýnıversıtetimen birlesip qurylǵan Bilim akademıasy aıasynda iske asyrylýda. Ortalyqtyń ashylýy ǵylymı almasýdy tereńdetý jáne joǵary bilikti mamandardy daıarlaý úshin negiz bolmaq. Joba aıasynda STEAM-bilim berýdi, kóshbasshylyqty jáne baǵalaýdy damytýǵa erekshe nazar aýdarylady.
Kásibı damý ortalyǵynyń ashylý saltanatynda qyzyl lentany Qazaq ulttyq qyzdar pedagogıkalyq ýnıversıtetiniń basqarma tóraǵasy – rektory Gúlmıra Qanaı jáne Gonkong bilim berý ýnıversıtetiniń Prezıdenti, profesor Lı Chı Kın Djon qıdy.
«Biz Qazaq ulttyq qyzdar pedagogıkalyq ýnıversıtetimen yntymaqtastyq ornatqanymyzǵa qýanyshtymyz jáne ony úlken mártebe sanaımyz. Bizdiń kózqarasymyz ortaq – muǵalimderdiń kásibı deńgeıin arttyrý, Qazaqstandaǵy bilim berý sapasyn jaqsartý, sondaı-aq Gonkong AAR (Qytaı) men Qazaqstan arasyndaǵy iskerlik almasýdy damytý. Gonkong ýnıversıtetiniń kóp jyldyq tarıhy bar jáne bilim berý salasynda reıtıńi joǵary. Kóshbasshylyq, STEM bilim berý jáne baǵalaý salalarynda tájirıbemiz mol jáne osy baǵyttarda bilimimizben bólisýge, oqytý múmkindikterin usynýǵa, sondaı-aq ýnıversıtettermen birlesken zertteýler júrgizýge daıynbyz. Biz bul mańyzdy Akademıanyń bolashaq yntymaqtastyq úshin platforma retinde qyzmet etetinine senimdimiz», – dedi Gonkong bilim berý ýnıversıtetiniń prezıdenti, profesor Lı Chı Kın Djon.
QyzPU rektory Gúlmıra Qanaıdyń aıtýynsha, EdUHK – Qazaqstan bilim akademıasy aıasynda muǵalimderdiń kásibı biliktiligin arttyrý maqsatynda úsh baǵyt boıynsha oqý baǵdarlamalaryn ázirleý josparlanýda.
«Elimizde úlken mańyzdy jobalardyń biri iske asyrylyp jatyr. Qazirgi tańda Qazaq ulttyq qyzdar pedagogıkalyq ýnıversıteti, Abaı atyndaǵy ýnıversıtet jáne Gonkong bilim ýnıversıteti birlesip úlken Akademıa qurýda. Osy Akademıa aıasynda muǵalimderdiń biliktiligin arttyrýǵa baǵyttalǵan bes oqý baǵdarlamasyn ázirleýdi josparlap otyrmyz. Úsh ýnıversıtet ázirleıtin bul baǵdarlamalar halyqaralyq deńgeıde sertıfıkattalyp, mektep muǵalimderiniń kásibı biliktiligin arttyrýǵa kómektesedi. Abai University jasandy ıntellekt jáne ınklúzıvti bilim berý boıynsha negizgi baǵdarlamalardy ázirleıdi. QyzPU kóshbasshylyq, STEAM-bilim berý jáne baǵalaý máselelerine jaýapty bolady. Qazirgi ýaqytta elimizde 800-den astam «Komfortty mektepter» salynýda. Osy mektepterge mamandar daıarlaý men kóshbasshylyq boıynsha kýrstar ótkizý óte mańyzdy. Kóshbasshylyq baǵyty boıynsha qazirgi jáne bolashaq mektep basshylarynyń daǵdylary men bilimin damytýǵa kóńil bólinedi. Sonymen qatar STEM-bilim berýdi damytý, ásirese qyz balalardy osy baǵyttar boıynsha oqytý – álemdik turaqty damý men genderlik teńdik maqsattarynyń biri. Osyǵan baılanysty biz muǵalimderge arnalǵan STEM baǵytyndaǵy biliktilikti arttyrý kýrstaryn uıymdastyrýdy jáne ýnıversıtetimizdiń stýdentteri men mektep muǵalimderine arnalǵan oqý baǵdarlamalaryn jetildirýdi josparlap otyrmyz. Úshinshi baǵyt – bilimdi baǵalaý júıesin jetildirý, baǵalaý túrlerin synyptyq, ulttyq jáne halyqaralyq deńgeıde damytý. Úsh ýnıversıtet arasyndaǵy bul aýqymdy bastama bolashaqta oń ózgeristerge alyp keletinine senimdimiz. Biz bul baǵdarlamalardy mektep muǵalimderine osy jyldyń kúzine qaraı usynýdy josparlap otyrmyz», – dedi QyzPU rektory Gúlmıra Qanaı.
İs-sharaǵa Qazaqstan men Gonkong ýnıversıtetteriniń ókilderi, oqytýshylary jáne stýdentteri qatysty. Kásibı damý ortalyǵynyń ashylýynda Qazaq ulttyq qyzdar pedagogıkalyq ýnıversıtetiniń ǵylymı jumys jáne halyqaralyq yntymaqtastyq jónindegi prorektory Zakır Jumakulov sóz sóıledi. Óz sózinde ol mınıstr Saıasat Nurbek bir jyl buryn aıtqan bastama júzege asyrylyp jatqanyn atap ótti.
«Pedagogıkalyq ýnıversıtetter retinde bizdiń mısıamyz – mektep bilimin jaqsartý. Mektep júıesin aldyńǵy qatarly bilimmen qamtamasyz etý úshin birlesip ǵylymı zertteýler júrgizý jáne únemi jańa bilimniń shyńynda bolý kerek. Osy sebepti ǵalymdar tańdalǵan baǵyttar boıynsha birlesken zertteýler júrgizetin bolady. Júrgizilgen jumystyń nátıjesi ulttyq deńgeıde áser etetin bolady, óıtkeni birlesken akademıa Qazaqstannyń óńirlik joǵary oqý oryndarynyń alánsyn da qamtıdy, oǵan pedagogıka boıynsha bilim berý baǵdarlamalary bar 6 joǵary oqý orny kiredi», – dedi ol.
EdUHK jáne QyzPU arasyndaǵy birlesken kásibı damý ortalyǵynyń saltanatty ashylý bilim berý júıesin transformasıalaýda, álemdik ozyq tájirıbelerdi engizýde jáne halyqaralyq yntymaqtastyqty damytýda mańyzdy qadam bolyp tabylady. Akademıalyq almasý men ınovasıalardy engizýge baǵyttalǵan bul baǵdarlama jastardy qazirgi zamannyń talaptaryna saı mamandar retinde daıarlaýǵa úles qosady.