2025 jylǵy 1 naýryzda Almaty qalasynyń Tótenshe jaǵdaılar departamenti (TJD) azamattyq qorǵanys salasyndaǵy mańyzdy is-shara ótkizedi. "Astana" alańynda uıymdastyrylatyn kórme barysynda órt sóndirý, qutqarý jáne medısınalyq qural-jabdyqtar kópshilik nazaryna usynylady. Bul týraly Aqshamnews.kz saıty habarlaıdy.
Kórmege kelgen qala turǵyndary men qonaqtary Almatynyń avarıalyq-qutqarý kúshteriniń múmkindikterimen tanysa alady. Sondaı-aq, arnaıy uıymdastyrylǵan dalalyq gospıtálda medısınalyq qyzmetkerler shuǵyl kómek kórsetý boıynsha master-klass ótkizedi. Oqytý barysynda dene jaraqattary bar manekenderde alǵashqy medısınalyq kómek kórsetý tásilderi kórsetiledi.
Kórme aıasynda qutqarý jáne medısınalyq tehnıka, jabdyqtar da kórermenderge usynylady. Sonymen qatar, jer silkinisin seziný trenajeri jumys isteıdi. Bul utqyr platforma jer silkinisiniń kóldeneń jáne tik dúmpýlerin shynaıy túrde beıneleıtin úı bólmesiniń maketin kórsetedi.
Azamattyq qorǵanys kórmesiniń erekshelikteriniń biri – 90 metr bıiktikten qutqarýǵa arnalǵan Qazaqstandaǵy eń bıik ıindi kótergishti tamashalaý múmkindigi. Bul jabdyq bıik ǵımarattardaǵy tótenshe jaǵdaılarda qutqarý jumystaryn júrgizýge arnalǵan jáne tehnıkalyq jabdyqtalý deńgeıin aıqyndaıdy.
Bul is-shara azamattyq qorǵanys pen qaýipsizdik mádenıetin qalyptastyrýǵa baǵyttalǵan. Dúnıejúzilik Azamattyq qorǵanys kúni Halyqaralyq azamattyq qorǵanys uıymy (HAQU) Bas Assambleıasynyń sheshimimen 1990 jyldan bastap jyl saıyn 1 naýryzda atalyp ótedi.
Qazaqstan 1996 jyly HAQU músheligine kirip, halyqty jáne aýmaqtardy tótenshe jaǵdaılardan qorǵaý baǵytynda halyqaralyq deńgeıde belsendi yntymaqtastyq jasap keledi.
Qala turǵyndary úshin bul shara qaýipsizdik salasyndaǵy mańyzdy aqparatpen tanysýǵa, qutqarý qyzmetteriniń jumysyn kórýge jáne tótenshe jaǵdaılarǵa daıyn bolýǵa múmkindik beredi.