Kúdikti urlanǵan zattardy lombardqa ótkizip turǵan jerinen ustaldy
Jedel izdestirý is-sharalaryn júrgizý barysynda Kentaý qalasynyń birindegi qonaq úıge aıaldaǵan Óskemenniń eki turǵyny Túrkistan QPB krımınaldyq polısıa qyzmetkerleriniń nazaryna tústi. Olardyń birin jedel ýákilder urlap alǵan zattardy Túrkistan qalasyndaǵy lombardqa ótkizip turǵan jerinen qolǵa túsirdi.
«Biz ustaǵan jigittiń buryn qaraqshylyq qylmysy úshin sottalǵanyn anyqtadyq. Kúdiktiniń aıtýynsha, dosymen birge 5 qańtarda Almatyǵa barǵan. Iaǵnı, jappaı tártipsizdik kezinde Kcell, Activ dúkenderiniń birin tonap, ol jerden bes Samsung telefonyn, eki symsyz qulaqqapty jáne Apple Watch brendtik smart-saǵatty urlap, alyp ketken. Osylaısha olar mıllıon teńge kóleminde materıaldyq shyǵyn keltirgen. İzderin jasyrý maqsatynda jas jigitter Óskemenge qaıtqan. Sol jaqta úsh telefondy lombardqa ótkizip, aqshasyn óz qajettilikterine jumsap jibergen. Aldyn ala josparly túrde áreket etken ekeý blok-beketterdiń barlyq jerde alynyp tastalǵanyn paıdalanyp, Túrkistan oblysyna taksımen kelgen. Búgingi tańda atalǵan jaıtqa baılanysty tergeýshilermen QR QK 188-baby (Urlyq) boıynsha sotqa deıingi tergeý jumystary júrgizilýde. Kúdikti qamaýǵa alyndy. Al aıǵaqty zat retinde urlanǵan zattardyń bir bóligi tárkilendi. Sotqa deıingi tergeý kezinde biz osy qylmystyń barlyq jaı-japsaryn anyqtaıtyn bolamyz», – dedi Túrkistan oblysynyń polısıa departamenti bastyǵynyń orynbasary Asyljan Qaldarbekov.
Qazirgi tańda polısıa qyzmetkerlerimen kúdiktiniń sybaılasy izdestirilýde.