Qazir qaladan dızel otynyn tabý qıyn.
Keıbir janarmaı quıý beketteri shektep beretin bolǵan. Quny bylaı tursyn, sapasyna syn aıtýshylar da kóp. Alǵashqy qar jaýyp, azdap kún sýytyp edi, dızel syr bere bastady, dep habarlaıdy Almaty-akshamy.kz «Habar 24»-ke silteme jasap.
Apta basynda Almatyda kún sýytty. Biraq dál osyndaı aýa raıynda maýsymaralyq dızeldiń qatýyn birinshi ret kórip otyrmyz deıdi kóp jyldyq tájirıbesi bar kólik júrgizýshileri Janarmaıdyń qoımaljynǵa aınalyp ketkendigin júrgizýshiler áleýmettik jelilerge jarysa jarıalap, ashý-yzalaryn bildirip jatty. Buǵan qosa, qazir qaladan dızel otynyn tabý qıyn. Al baǵasy sharyqtap tur.
Rýslan Qambolov, kólik júrgizýshi: - Buryn mınýs 10-15 gradýsta júre beretinbiz. Qazir dala jyly, janarmaı muz bolyp qatyp jatyr. Aıtatyny joq. Ondaıdy satpaı-aq, úıde jatqan jaqsy. 1-2 jerde ǵana satyp jatyr. Keshe barsaq, 70 lıtr, 30 lıtr deıdi. Biraq kúnde jaǵyp tastaıtyn janarmaı ǵoı.
Dıas Nurǵalıev, kólik júrgizýshi: - Janarmaıdyń sapasy óte nashar bolǵandyqtan parafın degen óte kóp. Sý qatqan joq, janarmaı qatyp jatty ǵoı. Jolda qanshama turdyq.
Bir ǵana Rysqulov dańǵylynyń boıynda 30-ǵa jýyq janar-jaǵarmaı quıý beketi bar. Alaıda, dızel tapshy. Ol ne talonmen nemese arnaıy kartamen óte az mólsherde ǵana beriledi. İzdep júrip tapsańyz da, lıtri 285 teńdegen tómenine sırek jolyǵasyz. Oǵan da uzyn sonar kezek bar.
Stanıslav Iaroshenko, tasymaldaý kompanıasynyń basshysy: - Janarmaı qymbattasa, taýardy tasymaldaý baǵasy da ósedi. Sebebi júk kólikteriniń jol shyǵynyna jumsalatyn aqshanyń 30-50 prosenti janarmaıǵa ketedi. Ol naryqtaǵy ózge de ónim men qyzmet túrleriniń qunyna áser etpeı qoımaıdy. Buǵan qosa sapasyz dızel avtokólik qozǵaltqyshynyń merziminen buryn buzylýyna ákeledi. Ony jóndeý úshin kólik ıesi taǵy shyǵyndanady.
Alda qys kele jatyr. Sondyqtan jaýapty mekemeler sapa men baǵa máselesin erterek rettese deıdi júk tasýshylar. Jalpy otyn sapasyn baqylaý janarmaıdy kóterme jáne bólshek satýmen aınalysatyndardyń jaýapkershiligine tıesili. Sondyqtan janarmaı quıǵan soń túbirtek alýdy umytpaǵan abzal. Eger sapasyz solárkanyń kesirinen kóligińizge zıan tıse, aryzdanýǵa qajet bolady.