"Qazaqstan" qonaq úıiniń "Elegant Hall" konferens-zalynda dinı ekstremızm men terorızmniń aldyn alý boıynsha aqparattyq-túsindirý toptarynyń jyldyq qorytyndysyna arnalǵan dóńgelek ústel ótti. İs-sharany Almaty qalasy Din isteri jónindegi basqarmasynyń "Din máselelerin zertteý ortalyǵy" uıymdastyrdy.
Jıyn barysynda Almaty qalasy Din isteri jónindegi basqarmasynyń "Din máselelerin zertteý ortalyǵy" KMM basshysy Dýlat Ibragımov aǵymdaǵy jyly qalada 655 túsindirý is-sharasy ótkizilip, 73 860 adam qamtylǵanyn atap ótti. Jalpy, aqparattyq jumystyń basym bóligi naqty maqsatty aýdıtorıalarǵa baǵyttalǵan. Onyń aıtýynsha, túsindirý jumystary sottalǵandar, dindar toptar, eńbek mıgranttary, áleýmettik álsiz azamattar, jumyssyzdar, sportshylar, mádenıet qyzmetkerleri, bilim berý uıymdary, memlekettik qurylymdar men quqyq qorǵaý organdary arasynda júrgizildi. Jyl boıy ortalyqtyń áleýmettik jelidegi arnaıy paraqshasyna 500-den astam usynys pen pikir túsken. Aldaǵy jyly jumysty jetildirý jáne qamtý aıasyn keńeıtý josparlanǵan.
Almaty qalasy Din isteri jónindegi basqarmasynyń basshysy Nurlan Qıqymov aqparattyq-túsindirý jumysynyń tásilderi týraly aıta kele, bul qyzmettiń búkil qala turǵyndaryna buqaralyq túrde emes, din ıdeologıasyna qyzyǵýshylyq tanytqan nemese qaýip tóndirýi múmkin toptarǵa baǵyttalatynyn jetkizdi. Onyń aıtýynsha, qala halqynyń ósimimen birge dinı máseleler boıynsha túsindirý jumysyna degen qajettilik te artyp otyr.
Jıynda aqparattyq-túsindirý tobynyń músheleri usynystaryn ortaǵa salyp, jumys tıimdiligin arttyrý joldaryn talqylady. Qatysýshylar broshúra daıyndaý, sheteldik sarapshylardy tartý jáne áleýmettik paraqshadaǵy belsendilikti kúsheıtý qajettigin atap ótti.
Dóńgelek ústel qorytyndysynda jyl boıy joǵary kásibılik kórsetken úzdik
sarapshylar Almaty qalasy Din isteri jónindegi basqarmasynyń Alǵys hattarymen jáne baǵaly syılyqtarymen marapattaldy.
"Memleketimizdiń din salasyndaǵy saıasatyn ilgeriletýge qosqan úlesi úshin, qoǵamda dinı ekstremızm men terorızmniń aldyn alý jáne zaıyrlylyq qaǵıdattaryn nasıhattaý baǵytyndaǵy belsendi eńbekteri úshin alǵys bildiremiz", – dedi Nurlan Qıqymov.
Aıta keteıik, qaladaǵy aqparattyq-túsindirý toptarynda bıyl 68 sarapshy eńbek etti. Onyń 32-si qazaq tilinde, 10-y orystildi, 26 maman eki tilde jumys júrgizgen.