Bul is-sharalar 28 myń adamdy qamtydy. Bul týraly Óńirlik komýnıkasıalar qyzmetiniń alańynda Almaty qalasy Din isteri basqarmasynyń basshysy Nurlan Qıqymov málimdedi, dep habarlaıdy aqshamnews.kz
Dinı ekstremızm men terorızm ıdeologıasynyń taralýynyń aldyn alý sheńberinde megapolıste din, saıasat, tarıh, psıhologıa, mádenıet, quqyq jáne t. b. salalarda 42 mamannan turatyn aqparattyq-túsindirý toby jumys isteıdi.
ÓKQ spıkeri Nurlan Qıqymov atap ótkendeı, aqparattyq-túsindirý jumystary barysynda halyqtyń teris dinı ıdeologıaǵa osal toptaryna negizgi basymdyq beriledi.
"Jyl basynan beri dinı ekstremızm men terorızmniń aldyn alý aıasynda barlyǵy 28 myń adamdy qamtıtyn 334 is-shara ótkizildi. Budan basqa, radıkaldy dinı ıdeologıaǵa ımýnıtetti qalyptastyrý jáne halyqtyń dindar bóligi arasynda dástúrli rýhanı sanany nyǵaıtý maqsatynda profılaktıkalyq jumysqa meshitterdiń bilikti ımamdary tartylady. Bul baǵytta jyl basynan beri 500-ge jýyq kezdesý uıymdastyrylyp, 60 myńǵa jýyq adam qamtyldy. Sondaı - aq, 3 myńǵa jýyq adamnyń qatysýymen qazaq halqynyń salt-dástúrleri, tarıhy, aǵartýshylary men batyrlary týraly 10 vıktorına ótkizildi", - dedi ol.
Sonymen qatar, din salasyndaǵy zańnama talaptaryna qatysty 629 myń aqparattyq broshúra ázirlenip, jeke jáne kópqabatty úılerdiń turǵyndary arasynda taratyldy.
Ekstremıstik jáne radıkaldy dinı ıdeologıadan zardap shekken azamattardy ońaltýǵa erekshe nazar aýdarylady. Basqarma janynan 2017 jyldan bastap konsýltasıa jáne teologıalyq ońaltý qyzmetterin kórsetetin arnaıy ortalyq jumys isteıdi.
"Aǵymdaǵy jyldyń basynan bastap atalǵan ortalyqtyń qyzmeti sheńberinde bilikti teolog-mamandar men psıhologtardy tarta otyryp, teris dinı ıdeologıanyń yqpalyna ushyraǵan 1000-nan astam adammen jumys júrgizildi. 7 aıdyń qorytyndysy boıynsha júrgizilgen jumystyń nátıjesinde 84 adam aqtaldy", - dedi N. Qıqymov.
Sondaı-aq, "Jýsan"operasıasy aıasynda elge qaıtarylǵan azamattarǵa áleýmettik qoldaý kórsetý boıynsha jumystar júrgizilýde.
Basqarma ınternet arqyly dinı ekstremıstik ıdeologıanyń keń taralýyna qarsy turý maqsatynda qarsy úgit-nasıhat jumystaryn belsendi júrgizýde.
Osylaısha, jyl basynan beri radıkaldy dinı ıdeologıanyń zıandylyǵy týraly 200-den astam foto jáne beınematerıaldar daıyndaldy, bul materıaldar áleýmettik jelilerdegi resmı betterde, sondaı-aq blogerlerdiń, dintanýshylardyń, ımamdardyń, jalpy sany 2,2 mln.jazylýshysy bar mádenıet jáne óner ókilderiniń áleýmettik jelilerdegi paraqshalarynda jáne tanymal aqparattyq portaldar men aýmaqtyq BAQ-ta jarıalandy.
"Qarsy nasıhattaý jumysynyń nátıjeliligin arttyrý maqsatynda SMM jáne dızaın salasyndaǵy mamandar tartylady, sondaı - aq áleýmettik jelilerde paıdalanýshylardy qyzyqtyra alatyn sapaly jáne ózekti materıaldardy ázirleýge basymdyq beriledi", - dep tolyqtyrdy spıker.
Basqarma turaqty negizde ekstremıstik sıpattaǵy toptarǵa qol qoıylǵan áleýmettik jelilerdi paıdalanýshylardy anyqtaý boıynsha monıtorıń júrgizedi. Bıyl osy jumys aıasynda 144 myńnan astam qoldanýshy qamtyldy.
Úgit-nasıhat jumystaryn júrgizýge jol bermeý maqsatynda ekstremıstik sıpattaǵy anyqtalǵan toptardyń derekteri olardy odan ári buǵattaý úshin turaqty negizde dintaný saraptamasyna jiberiledi.
Sonymen qatar, jyl basynan beri QR Din salasyndaǵy zańnamasyn buzýdyń 9 faktisi anyqtaldy, olar boıynsha tıisti sharalar qabyldandy.
Basqarmanyń málimetinshe, Almatyda barlyǵy 17 konfesıanyń múddesin bildiretin 192 dinı birlestik tirkelgen. Qala aýmaǵynda 118 dinı ǵımarat jumys isteıdi.