Almatyda Abaı Qunanbaevtyń 179 jyldyǵy qurmetine oraı, Respýblıka Saraıy aldynda eskertkishine gúl shoqtaryn qoıý rásimi ótti. Bul is-sharaǵa Almaty qalasy ákiminiń orynbasary Azamat Qaldybekov, Qazaqstan Jazýshylar odaǵy tóraǵasynyń orynbasary Qasymhan Begmanov, QR Parlamenti Májilisiniń depýtattary, Almatydaǵy Qytaı Halyq Respýblıkasynyń Bas konsýly Szán Veı, jazýshylar, ǵalymdar, qoǵam qaıratkerleri, stýdentter jáne qala qonaqtary qatysty, dep habarlaıdy aqshamnews.kz
Qasymhan Begmanov Abaıdyń shyǵarmashylyǵy men rýhanı murasynyń urpaqtar arasyndaǵy mańyzdylyǵyn atap ótti. Shara barysynda stýdentter Abaıdyń óleńderin jatqa oqyp, aqynnyń shyǵarmalaryna degen súıispenshilikterin bildirdi.
Keıinirek "Adamzattyń Abaıy" atty jyr músháırasy ótip, Abaıdyń tanymal shyǵarmalarynan úzindiler oqyldy, kitaptar men etnoónimder kórme-jármeńkesi uıymdastyryldy. Abaı Qunanbaevtyń fılosofıalyq oılary men qazaq halqynyń rýhyn beıneleıtin shyǵarmalary Qazaqstannyń ǵana emes, búkil álemniń mádenı murasynyń bir bóligi ekeni atap ótildi.
Abaıdyń týǵan kúnine oraı "Alataý" dástúrli óner teatrynda "Abaı álemi" atty konsert-spektakl ótti. Rejıser Farhad Moldaǵalıdiń basshylyǵymen Bolat Ábdilmanov, Erlan Bilál, Núrken Óteýil syndy tanymal akterler uly aqynnyń ómirinen syr shertip, shyǵarmashylyǵyndaǵy jahandyq taqyryptardy qozǵady. Konsertte "Mýzart" toby, Erden Jaqsybek, IL Canto toby, Steppe Sons toby, Ernar Amandyq jáne T. Júrgenov atyndaǵy Qazaq ulttyq óner akademıasynyń hory óner kórsetti.
Almaty qalasynyń oqý ortalyqtary men kitaphanalarynda Abaıdyń óleńderi men qara sózderin mánerlep oqý baıqaýlary uıymdastyryldy. Jalpy, Almatyda 7-10 tamyz aralyǵynda Abaı kúnine oraı 20-dan astam is-shara ótkiziledi.
Esterińizge sala keteıik, Abaı kúni 2020 jyly Qazaqstan Respýblıkasy Úkimetiniń qaýlysymen merekelik dataǵa aınaldy.