«İle» oqý polıgonynda Almaty, Taldyqorǵan jáne Qonaev garnızondary serjanttarynyń oqý-ádistemelik jıyny aıaqtaldy.
Bes kúndik oqý-ádistemelik jıynǵa mamandyq boıynsha daıyndyq, ádistemelik jáne baqylaý sabaqtary kirdi, dep habarlaıdy aqshamnews.kz Qorǵanys mınıstrligine silteme jasap.
Nusqaýshylar atys qarýy, qarý-jaraq (BTR, «Arlan» BKM), granatomet jáne qol granatalary, mergendik is, taktıkalyq, medısına, baılanys jáne taý daıyndyǵy sekildi jeti baǵyt boıynsha oqýdan ótti.
– Nusqaýshylardyń bilimi men daǵdylaryn jetildirýge, jeke quramdy oqytýdyń biryńǵaı ádistemesin jáne mamandyq boıynsha oqytýdyń ozyq tájirıbesin ıgerýge basty nazar aýdaryldy, – dep naqtylady Desanttyq-shabýyldaý áskerleri qolbasshysy basqarmasynyń serjanttyq qurammen jumys jónindegi bólim nusqaýshysy 1-synypty serjant Rashıd Bısenǵalıev.
Jıyn aıaqtalǵannan keıin qyryqtan astam serjant jeke quramdy mamandyqtar boıynsha oqytýǵa ruqsat beretin sertıfıkattar aldy.