2022 jyly 8-9 jeltoqsan kúnderi Qurmanǵazy atyndaǵy Qazaq ulttyq konservatorıasynda QR eńbek sińirgen qaıratkeri, profesor Saharbaeva Kárıma Súndetqyzynyń 70 jyldyq mereıtoıyna oraı «HHİ ǵasyrdaǵy dástúrli mýzyka: zertteý máseleleri» atty halyqaralyq ǵylymı-praktıkalyq konferensıasyn jáne «Dástúrli óner – altyn arqaý» atty konserti ótedi, dep habarlaıdy Almaty-akshamy.kz.
Shara aıasynda Aıtqalı Jaıymov, Bilál Ysqaqov, Kárıma Saharbaeva, Arman Jaıymnyń birigip shyǵarǵan «Dombyra sazy» kitabynyń tusaýkeseri jáne óner qaıratkerleri men zertteýshi ǵalymdardyń sheberlik synyptary da ótpek.
Mereıtoılyq konsertte Qurmanǵazy atyndaǵy Qazaq ulttyq orkestri – bas dırıjeri A. Tilepbergenov, dırıjer QR eńbek sińirgen qaıratkeri A. Jaıymov, Qyrǵyzstannyń halyq artısi R. Amanova, QR eńbek sińirgen artısi R. Aıdarbaeva, Qyrǵyzstannyń eńbek sińirgen artısi S. Kocherbaev, konservatorıa ustazdary Q. Jumaǵalı, Á. Alına, T. Sádenov, A. Qoıshybaev jáne ardager-ustazdyń shákirtteri óner kórsetedi. Konsertti Mádenıet qaıratkeri, «Qurmet» ordeniniń ıegeri Abdýlhamıt Raıymbergenov júrgizedi.
Saharbaeva Kárıma Súndetqyzy – Qurmanǵazy atyndaǵy Qazaq ulttyq konservatorıasynyń profesory, kúıshi-ustaz, óner zertteýshisi, QR eńbek sińirgen qaıratkeri, Mahambet atyndaǵy syılyqtyń ıegeri, Halyqaralyq «TÚRİKSOI» birlestiginiń múshesi. K.Saharbaeva Halyq mýzykasy fakúlteti quramynda fólklorlyq sazsyrnaı, jetigen aspaptarynyń mamandyq klastaryn ashty. Fakúltettik ult aspaptar orkestri, ansámblderi, jeke oryndaýshylar ujymyn basqaryp gastróldik saparmen Germanıa, Avstrıa, Qytaı, Túrkıa, Reseı, t.b. kóptegen shet elderde qazaq mýzykasyn nasıhattady. Oqý-ádistemelik, ǵylymı-zertteýshilik, kúıtanýshylyq salasynda «Dombyra-Dastan» dombyra men fortepıanaǵa arnalǵan birqatar monografıalyq eńbekterdiń avtory. Kúıshi-kompozıtor Q.Ahmedıarovtyń shyǵarmashylyǵyn, oı-tolǵamdaryn, kúıleriniń shyǵý tarıhyn, oryndaýshylyq sheberligin, jan-jaqty zerttep, «Tabyný», «Shynar», «Kúı-uran», «Kúı-tolǵaý» eńbekterin qurastyryp shyǵardy. Memlekettik «Mádenı-mura» baǵdarlamasy aıasynda konservatorıa men M. Áýezov atyndaǵy «Ádebıet jáne óner» ınstıtýty birlestiginde shyqqan «Qazaq mýzykasynyń antologıasy» kóp tomdyǵy avtorlarynyń biri.
Konferensıaǵa – otandyq jáne sheteldik mýzyka zertteýshileri, mýzykalyq JOO-nyń jáne mýzyka kolejderiniń oqytýshylary, dástúrli mýzyka oryndaýshylary men táýelsiz zertteýshiler qatysady.