Almatyda dárigerdi atyp óltirgen kúdiktiniń isine taǵy bir qylmystyq bap qosyldy. Oǵan Iýrıı Shýmkovty óltiremin dep qorqytty degen aıyp taǵylyp otyr, dep habarlaıdy Almaty-akshamy.kz QazAqparatqa silteme jasap.
«Qamaýǵa alynǵan kúdiktige qatysty taǵy bir bap qosyldy. Qazir QR Qylmystyq kodeksiniń 115-baby (Adam óltiremin nemese densaýlyqqa aýyr zıan keltiremin dep qorqytý, sol sıaqty adamǵa qatysty ózge de aýyr kúsh qoldaný) boıynsha sotqa deıingi tergeý bastaldy» , - dep habarlady qalalyq prokýratýranyń baspasóz qyzmeti.
Oqıǵa bolǵan kúni Bostandyq aýdandyq polısıa basqarmasy sotqa deıingi tergeýdi bastaǵan bolatyn. Qozǵalǵan qylmystyq ister biriktirildi. Qazir ol Almaty qalalyq polısıa departamenti jedel-tergeý tobynyń óndirisinde. Qylmystyq istiń sebebi men basqa da mán-jaılaryn anyqtaýǵa, sondaı-aq tolyqtyǵyn qamtamasyz etýge baǵyttalǵan qajetti tergeý áreketteri júrgizilip jatyr.
«Qylmystyq is boıynsha prosesýaldyq prokýror taǵaıyndalyp, oǵan QR Qylmystyq-prosestik kodeksiniń 197-babyna sáıkes jazbasha nusqaý berildi» , - dep atap ótti vedomstvadan.
Eske salaıyq, 4 sáýir kúni Almatyda belgili gastroenterolog Iýrıı Shýmkovty pasıenti bolǵan adam ań aýlaıtyn qarýdan atyp óltirdi. Keıin Densaýlyq saqtaý mınıstri Ajar Ǵınıat dárigerdiń ólimine qatysty pikir bildirdi. Dárigerdiń artynda, jubaıy, úsh balasy men qart ata-anasy qaldy.