Almaty polısıasy tasymaldaýshylardy jeke jaýapkershilikke shaqyrady.
Almatyda jolaýshylar tasymaly salasyndaǵy qaýipsizdikti qamtamasyz etý maqsatynda «Tasymaldaýshy» jedel-aldyn alý is-sharasy júrgizilýde, dep habarlaıdy aqshamnews.kz.
Polisia.kz málimetinshe, bul shara jolaýshylardyń qaýipsizdigin arttyrýǵa jáne qoǵamdyq kólikterdegi quqyq buzýshylyqtardy boldyrmaýǵa baǵyttalǵan. İs-shara barysynda polısıa qyzmetkerleri kólik quralyn mas kúıinde basqarý, júrgizýshi kýáliginen aıyrylǵandardyń kólik júrgizýi, uıaly telefondy paıdalaný, sondaı-aq toqtaý men turaq erejelerin buzý derekterin anyqtaýǵa basa nazar aýdarýda. Sharanyń basty maqsaty – qoǵamdyq kóliktegi kez kelgen quqyq buzýshylyqqa «múldem tózbeýshilik» qaǵıdatyn engizý, zańnamany saqtaý jáne qaýipsizdik deńgeıin joǵarylatý. Almaty qalalyq polısıa departamentiniń derekterine súıensek, ótken jyly jolaýshylar kóligi júrgizýshileriniń kinásinen 320 jol-kólik oqıǵasy tirkelgen. Sonyń saldarynan 379 adam jaraqat alyp, 6 adam qaza tapqan. Júrgizilgen taldaý kórsetkendeı, osyndaı oqıǵalardyń negizgi sebepteri jyldamdyqty shekten asyrý, manevr jasaý erejelerin buzý jáne kólik júrgizý kezinde uıaly telefondy paıdalaný bolyp tabylady.
– Shara aıasynda polısıa qyzmetkerleri jolaýshylar kóligin tekserip, kólik júrgizýshileriniń tártibin arttyrýǵa kúsh salýda. Bizdiń maqsat – tehnıkalyq aqaýy bar nemese zańsyz qaıta jabdyqtalǵan kólikterdi paıdalanýǵa jol bermeý, jolaýshylar men júkti tasymaldaý kezinde zańnamany saqtaý jáne zańsyz jolaýshylar tasymalyna tosqaýyl qoıý. Bul jumystarǵa memlekettik organdar men azamattyq qoǵam ókilderi belsendi túrde tartyldy, – dedi Almaty qalalyq polısıa departamenti ákimshilik polısıa basqarmasy bastyǵynyń orynbasary Darhan Aıymbetov.
Eki kúnniń ishinde jolaýshylar kóligi júrgizýshileri jasaǵan 382 jol erejesin buzý deregi anyqtaldy. Sonymen qatar tehnıkalyq aqaýy bar úsh kólik arnaıy aıyppul turaǵyna qoıyldy.