Bul týraly qala ákimi Erbolat Dosaev Ortalyq komýnıkasıalar qyzmetinde ótken brıfıńte Jeltoksan kóshesi men Raıymbek dańǵylynda BRT jobasyn iske asyrý merzimderine qatysty qoıylǵan suraqqa jaýap bere otyryp málimdedi.
«Qazirgi ýaqytta Jeltoksan kóshesinde uzyndyǵy 4,6 km jáne Raıymbek dańǵylynda 17,2 km bolatyn eki BRT jelisin salý josparlanýda. Prosesterdi ońtaılandyrý úshin Raıymbek dańǵylyndaǵy joba eki kezeńge bólindi. Jumystardy birinshi kezeń boıynsha kúzde bastaýǵa bolar edi, biraq sarapshylar qaýymdastyǵymen keńesip, qala turǵyndaryna keltiriletin qolaısyzdyqtardy azaıtý maqsatynda eki kezeńde de bir ýaqytta jumys bastaý týraly sheshim qabyldandy. 2025 jyldyń qańtarynda Raıymbek dańǵylynyń eki bóligindegi jumystarǵa merdiger uıymdy tańdaý boıynsha konkýrs jarıalaý josparlanýda. Qurylys-montaj jumystary kelesi jyldyń naýryz aıynda bastalady», – dedi Erbolat Dosaev.
Qala basshysynyń aıtýynsha, dál osy ýaqytta Jeltoksan kóshesindegi BRT jobasyn iske asyrý da bastalady.
«Biz jol qozǵalysy jolaǵyn taryltyp, qoǵamdyq kólikke arnalǵan qosymsha jolaq úshin keńistik bosatýdy josparlap otyrmyz. Joba Raıymbek dańǵylyndaǵydaı, "fasadtan fasadqa deıin" jumystardy, ınjenerlik ınfraqurylymdy aýystyrýdy kózdeıdi. 2025 jyldyń sońyna deıin eki jelini de aıaqtaý josparlanyp otyr», – dedi ol.
Osylaısha, Almatyda bar jelilerdi qosa alǵanda, BRT jelisiniń jalpy uzyndyǵy 30,5 km bolady.