Almaty qalasynda «Ýnıfaı ámbebap jekpe-jek» túrinen jasóspirimder men jastar arasynda aýǵan soǵysynyń ardageri, polkovnık Borıs Tókenuly Kerimbaevty (Qara-maıor) eske alýǵa arnalǵan respýblıkalyq týrnır ótti.
Ámbebap jekpe-jekten uıymdastyrylǵan týrnır - Aýǵan soǵysy ardageri Borıs Tókenulynyń qurmetine ótkizilip otyrǵan alǵashqy jarys. Batyrymyz áskerı qyzmetke ómiriniń 35 jyldan astam ýaqytyn berdi. Onyń eń qıyn, ári jaýapty kezeńi Aýǵanstanda ótti.
Ol Almaty oblysynyń Qapshaǵaı qalasyndaǵy 22-shi arnaıy maqsattaǵy qurama bazasynda uıymdastyrylǵan 177-shi arnaıy maqsattaǵy jasaqty basqardy. Bul qurylym negizinen qyrǵyzdardan, qazaqtardan, ózbekterden jáne tájikterden quralǵan soń «musylman batalóny» dep atalatyn.
Aýǵan soǵysynyń ardageri, halyq arasynda «qara maıor» atanyp ketken áıgili polkovnık Borıs Tókenuly Kerimbaevty eske alý týrnıri Almatydaǵy №4 mamandandyrylǵan balalar men jasóspirimder sport mektebinde ótti. Sporttyq is-sharanyń ashylý saltanatyna aýǵan soǵysynyń ardagerleri, qoǵam qaıratkerleri jáne búkil álemdik saıystardy elimizdiń kók týyn kóterip júrgen sportshylar qatysty.
Osy oraıda, alǵashqy quttyq sózi Qazaqstan Respýblıkasynyń Ardagerler qaýymdastyǵynyń tóraǵasy, «Ýnıfaı ámbebep jekpe-jek» federasıasynyń prezıdenti Bahytbek Smaǵulǵa berildi:
«Keńes áskerleriniń Aýǵan jerinen shyǵarylǵanyna 35 jyl tolýyn elimizde atap ótýde. Osy oraıda, sporttyq is shara Aýǵan soǵysynyń qaharmany, QR qarýly kúshteriniń aıaqqa turýyna úlken eńbek sińirgen qolbasshy Borıs Tókenulynyń qurmetine uıymdastyrylyp otyr.Ashylý saltanatyna qara moıordyń jasaǵy, birge qyzmet etken ardagerler qatysty. Ardagerler men sportshylardy arnaıy marapattaý rásimi ótti. Saıysty ótkizýdegi basty maqsatymyz dańqty batyrymyzdyń jasaǵan erligin urpaqqa ónege etip, nasıhattaý bolyp otyr. Sonymen qatar, jastardyń arasynda salaýatty ómir saltyn qalyptastyryp, eline degen mahabbatyryn arttyrý», – dedi B.Smaǵul.
Sporttyq is shara barysynda ardagerler men álem chempıondary jáne sport sheberleri Borıs Kerimbaev atyndaǵy «Ar-namys» tósbelgisimen marapattaldy. Jalpy jarysqa elimizdiń 7 óńirinen 270 astam sportshy qatysty. Saıys erejesi boıynsha 10-18 jas arasyndaǵy sportshylar óz arasynda shyn myqtyny anyqtady. Jarys jeńimpazdary arnaıy, baǵaly syılyqtarmen marapattaldy.
