İshki ister mınıstrligi bopsalaý jáne basqa da aýyr qylmystardy jasaıtyn qylmystyq toptardyń áreketiniń aldyn alý, anyqtaý jáne jolyn kesý boıynsha is-sharalardy júzege asyrýdy jalǵastyrýda.
3 maýsymda Almaty qalasy polısıa departamenti uıymdasqan qylmysqa qarsy kúres basqarmasynyń qyzmetkerleri Ulttyq qaýipsizdik komıteti jáne prokýratýra ókilderimen birlesip, birqatar aýyr qylmys jasady degen kúdikke ilingen adamdar tobyn ustady, dep habarlaıdy aqshamnews.kz Polisia.kz-ke silteme jasap.
-Olardyń bir epızodynda kúdiktiler shetel azamatyna kúsh qoldanyp, qorqytý arqyly ony jaldamaly páterde zańsyz ustaǵany jáne qysym kórsetý arqyly bes mıllıon teńge kólemindegi qarajatyn tartyp alǵany anyqtaldy. Sondaı-aq zańsyz qarý saqtaý jáne quqyqqa qaıshy janjaldarǵa qatysý faktileri tirkeldi. 25 tintý júrgizilip, nátıjesinde jeti tapansha, oq-dáriler, sýyq qarýlar men esirtki zattary tárkilendi. Anyqtalǵan barlyq faktiler boıynsha qylmystyq ister qozǵaldy. Barlyq kúdiktiler ýaqytsha ustaý ızolátoryna qamalyp, zańǵa sáıkes qatań jaýapkershilikke tartylady, - dedi İİM uıymdasqan qylmysqa qarsy kúres departamentiniń ókili Qýandyq Alpys.
İİM eldegi, onyń ishinde iri megapolısterdegi jedel ahýal quqyq qorǵaý organdarynyń turaqty baqylaýynda ekenin atap ótedi.