Almatyda QazKSR halyq ártisi, Memlekettik syılyqtyń ıegeri Bolat Aıýhanovqa memorıaldy taqta ornatyldy.
Saltanatty sharaǵa óner maıtalmanynyń jary Raıhan Esnazarqyzy, týystary, shákirtteri men áriptesteri qatysty, dep habarlaıdy Almaty-akshamy.kz.
Bolat Ǵazızuly Máskeý teatr óneri ınstıtýtynyń baletMeısterlik fakúltetin támamdaǵan. 1965 jylǵa deıin Abaı atyndaǵy Qazaq memlekettik akademıalyq opera jáne balet teatrynda balet ártisi boldy.
Keıin «Qazaqkonsertte» solıs, kórkemdik jetekshi qyzmetin atqardy. 1991 jyldan bastap Qazaq memlekettik klasıkalyq bı ansambliniń kórkemdik jetekshisi, 2003 jyldan beri Memlekettik akademıalyq bı teatrynyń dırektory laýazymyn atqarǵan edi. 100-den asa resenzıa, maqala, suhbattyń avtory. Qazaq, orys, túrik, lıtva, aǵylshyn jáne ýkraın tilderin bilgen. Aıýhanov byltyr 85 jasynda qaıtys boldy.
«Bolat Ǵazızuly tek qana baletmeıster emes, jalpy jazýshy, aqyn, dramatýrg. Azamat retinde de sondaı ádil, adal, barlyq nárseni tike aıtatyn keremet tulǵa boldy. Balet óneriniń ǵana keremet ókili emes, jalpy qazaq rýhanıatynyń keremet tulǵasy. Jáne qazaqty álemge tanytqan birden-bir sırek tulǵanyń biri», - deıdi jazýshy, Qazaqstannyń eńbek sińirgen qaıratkeri Maǵıra Qojahmetova.