Bylǵary qolǵap sheberleriniń týrnıri Saǵadat Nurmaǵambetovty eske alýǵa arnalǵan.
Sport dodasy tórt kúnge sozylyp, 25 mamyrda aıaqtalady.
QR Qorǵanys mınıstrligi Sport komıteti – Ortalyq sport klýbynyń bazasynda Keńes Odaǵynyń Batyry, № 1 Halyq qaharmany Qazaqstannyń tuńǵysh Qorǵanys mınıstri armıa generaly Saǵadat Nurmaǵambetovti eske alýǵa arnalǵan bokstan halyqaralyq týrnır saltanatty túrde ashyldy, dep habarlaıdy Almaty-akshamy.kz.
Qorǵanys mınıstrliginiń málimetinshe, týrnır bastalar aldynda onyń uıymdastyrýshylary, sportshylar men kýrsanttar Saǵadat Nurmaǵambetov atyndaǵy Qurlyq áskerleriniń áskerı ınstıtýtyndaǵy dańqty batyrdyń eskertkishine gúl shoqtaryn qoıdy.
Týrnırdiń saltanatty ashylýyna Qorǵanys mınıstrligi Sport komıtetiniń tóraǵasy – Ortalyq sport klýbynyń bastyǵy polkovnık Arman Ábeýov, KSRO-nyń eki dúrkin chempıony, Eýropa chempıony Kárimjan Ábdirahmanov jáne Batyrdyń qyzy Aısulý Nurmaǵambetova qatysty.
«Ataqty batyrdyń qurmetine arnalǵan dástúrli týrnır bıyl 27-shi ret ótkizilip otyr. Saǵadat Qojahmetuly elimiz Qarýly kúshteriniń bastaýynda turǵan tulǵa. Ol óz ómirin týǵan Otanyna qyzmet etýge arnady. Biz úshin ol qaharmandyqtyń, janqıarlyq pen áskerı boryshqa adaldyqtyń úlgisi», – dep atap ótti polkovnık Arman Ábeýov.
Aıta keteıik, jarysqa Qazaqstan, Armenıa, Ázerbaıjan, Qyrǵyzstan, Tájikstan, Túrkimenstan jáne Ózbekstannan kelgen 21 komandanyń quramyndaǵy 150-ge jýyq sportshy qatysady.
«Bul kúnderi bolyp jatqan is-sharalardyń bárin maıdanda qan tókken ardagerler men Jeńisti jaqyndatý jolynda tylda ter tókken jandardyń barlyǵyna qurmet dep bilemin. Ákem óz eliniń naǵyz patrıoty boldy. Ol úshin Otanǵa paıdasyn tıgizý úlken baqyt bolatyn. Jas táýelsiz memleketti qorǵaýǵa qabiletti Qazaqstan áskerin qurýǵa ol asa úlken jaýapkershilikpen keldi», – dedi Batyrdyń qyzy Aısulý Saǵadatqyzy.
Ol óziniń otbasynyń atynan ákesiniń qurmeti men aǵa býynnyń erligin ulyqtaý úshin jasalyp jatqan is-sharalarǵa rızashylyǵyn bildirdi.