Almatynyń referendým ýchaskelerinde adamdardyń qarasy kóp. Daýys berýge kelgen azamattardyń arasynda áleýmettik jelide myńdaǵan oqyrmany bar tanymal blogerler men tıktokerler bar, dep habarlaıdy aqshamnews.kz.
Megapolıstegi №101 referendým ýchaskesinde akter ári bloger Elaman Esentaev daýys berdi. Ol el bolashaǵy úshin mańyzdy máselede ár azamattyń daýysy mańyzdy ekenin aıtty.
- Referendým – halyqtyń senimin arttyrýǵa jáne AES salý týraly sheshimniń ádil ári ashyq qabyldanýyn qamtamasyz etýge múmkindik beredi. AES máselesine qatysty referendým ótkizý – halyqtyń daýsyna qulaq asý úshin jasalǵan durys qadam. Mundaı̆ sheshimder qabyldaýda tek úkimet emes, el azamattarynyń da kózqarasy eskerilýi tıis dep sanaı̆myn. Árbir azamattyń pikiri mańyzdy, árbir daýys eldiń bolashaǵyna yqpal etetin sheshimderge áser etedi, - dedi ol.
Al qazaq tilinde sabaq beretin qoǵam belsendisi, bloger Alına Kan referendým ýchaskelerindegi ashyqtyq pen ádildikti basa aıtyp ótti.
- Referendým adal ótip jatyr. Qanshama azamattar men azamatshalar áli de daýys berýge kelİp jatyr. Búgin elimizdiń bolashaǵy anyqtalýda. Halyq durys jaqty tandady degen oıdamyn, - dedi Alına Kan.
Almatynyń №621 referendým ýchaskesinde alǵashqylardyń biri bolyp daýys berýge barǵan bloger Dıana Toqtar bul onyń azamattyq paryzy ekenin aıtty. Al «Jas Live» jobasynyń jetekshisi, akter, bloger Meıirjan Kelemedenov referendýmǵa qatysý arqyly, el bolashaǵyna úles qosqanyn atap ótti. Ol qaladaǵy №108 ýchaskede óz tańdaýyn jasady.
- Búgin referendýmǵa qatysyp, óz daýysymdy berdim. Bul mańyzdy qadam, óıtkeni elimizdiń bolashaǵyna óz úlesimdi qosqym keldi. Ásirese, AES qurylysy sekildi mańyzdy másele talqylanyp jatqanda, elimizdiń bolashaǵyna beı-jáı qaramaı qatysýym azamattyq boryshym dep bilemin. Bul sheshim keleshek urpaq úshin qajet dep sanaımyn, - dedi Meıirjan Kelemedenov.
Almatyda daýys bergen bloger- tıktokerlerdiń qatarynda Bekzat Sultan men Damır Mutashov bar. Bekzat Sultan referendým arqyly halyqtyń saıası mádenıeti qalyptasyp jatqanyn aıtsa, ekinshisi bul naýqan ár adamǵa óz oıyn bildirýge múmkindik bergenin málimdedi.
«Qazaqstan KVN odaǵynyń» Almaty fılıalynyń dırektory, bloger Ońdasyn Qulymbetov ta búgingi referendým týraly óz oıyn bildirdi.
- Menińshe, suraq – AES qajet ne qajet emes degen máselede turǵan joq. Atom elektr stansasynyń qajet ekeni bárimizge belgili. Sebebi qazir álem jasyl energıaǵa umtylyp jatyr. Búgingi basty másele – qaýipsizdigi. Sondyqtan búgin belsendi azamat retinde daýys berip, keıin oń sheshim shyqsa, onyń qaýipsizdigine baılanysty suraqtardy qoǵam bolyp qadaǵalaý kerek dep oılaımyn, - dep atap ótti ol.