Almaty PD ákimshilik qamaýǵa alynǵandar úshin qabyldap-taratýdan arnaıy reportaj túsirildi.
Mas kúıde kólik júrgizgendi unatatyndar da osy jerde ákimshilik jazasyn óteıdi, dep habarlaıdy aqshamnews.kz Polisia.kz-ke silteme jasap.
– Belgili bolǵandaı, zań kólik quralyn esirtki nemese alkogóldik masań kúıde basqarǵany úshin jazany kúsheıtti. Bul úshin mınımaldy jaza, ákimshilik qamaýǵa alý jáne 7 jyl merzimge kólik quralyn basqarý quqyǵynan aıyrý. Al eger bul quqyq buzýshylyq qaıtalansa, qylmystyq jaýapkershilikke ákep soǵýy múmkin. Ótken jyly Almaty qalasynyń joldarynda aldyńǵy saptaǵy bólimshelerdiń qyzmetkerlerimen 2 myń 440 mas júrgizýshi ustalyp, kólik júrgizý quqyǵynan aıyryldy. Olardyń keıbireýleri jol-kólik oqıǵalarynyń kinálileri boldy, sonyń saldarynan adamdar zardap shekti, - dedi Almaty qalalyq PD ákimshilik polısıa basqarmasynyń basshysy Asqat Qulbaev. Sonymen qatar jergilikti polısıa qyzmetiniń málimetinshe, bıylǵy jyldyń basynan beri Almatyda kólikti mas kúıinde basqarǵan 197 adam ustalǵan. Solardyń biri – almatylyq N.esimdi azamatsha. Ol osy isi úshin ókinedi. – Qurbylarymmen dámhanada boldyq, sol jerde ishimdik iship, men rúlge otyrdym. Meni polısıa qyzmetkerleri ustady. Sot meni 7 jyl merzimge kólik aıdaý quqyǵymnan aıyryp, 20 táýlikke qamaýǵa aldy. Óz áreketime qatty ókinemin. Meniń qatelikterimdi qaıtalamańyzdar, - dedi áıel.