Búgin Óńirlik komýnıkasıalar qyzmetiniń alańynda Almaty qalasy Komýnaldyq ınfraqurylymdy damytý basqarmasynyń basshysy Danıar Qyryqbaev turǵyn úımen qamtamasyz etý boıynsha atqarylǵan jumystar týraly esep berdi, dep habarlaıdy Almaty-akshamy.kz Almaty qalasy Óńirlik komýnıkasıalar qyzmetine silteme jasap.
Danıar Qyryqbaev 2022 jylǵy 14 shildede Almaty qalasynyń Turǵyn úı saıasaty basqarmasy Almaty qalasynyń Komýnaldyq ınfraqurylymdy damytý basqarmasy bolyp ózgertilgenin eske saldy.
Danıar Qyryqbaevtyń habarlaýynsha, búginde Almaty qalasynda komýnaldyq turǵyn úı qorynan turǵyn úıge muqtajdar esebinde 37 236 azamat tur, onyń ishinde: kóp balalylar – 4905; jetimder – 2210; halyqtyń áleýmettik osal toptary – 16 999; búdjet qyzmetkerleri – 13 122.
«7 aıdyń qorytyndysy boıynsha, 2623 azamat turǵyn úımen qamtamasyz etildi. Aǵymdaǵy jyldyń sońyna deıin 5532 páter berý josparlanyp otyr, onyń ishinde: 1451 – satyp alý quqyǵynsyz jalǵa beriletin turǵyn úı jáne 4081 – nesıelik turǵyn úı. Atap ótsem, jyl basynan beri 325 turǵyn úı sertıfıkaty berildi», - dedi D.Qyryqbaev.
Turǵyn úı bólý týraly aıta kele, ÓKQ spıkeri qalany abattandyrý máselesine toqtaldy. Aıta keterligi, qaladaǵy qyzmet kórsetiletin joldardyń jalpy aýdany 25 mln m²-den asady. Almatynyń 2 318 kóshesinde tazalyq jumystary júrgizilýde. Qalada bul jóndeý jumystaryn 14 merdiger uıym júrgizedi.
Kún saıyn qala kóshelerinen 1413 jol jumysshysy men 1087 birlik arnaıy tehnıkanyń kúshimen 90 tonnadan astam qoqys shyǵarylady.