Ábilhan Qasteev atyndaǵy QR Memlekettik óner mýzeıiniń Ortalyq kórme zalynda Sýretshiler odaǵynyń múshesi, «Almaty oblysynyń úzdik sýretshisi» nomınasıasynyń ıegeri Marat Toteevtiń «Bir sáttiń máńgilik beınesi» atty jeke shyǵarmashylyq kórmesi ashyldy. Ekspozısıada sýretshiniń tabıǵat jáne portrettik janrdaǵy 150-ge jýyq týyndysy usynyldy.
Elimizdiń árbir ólkesin shynaıy sýrettegen sýretshi týyndylarynda ýaqyt pen bolmystyń áserli qubylystaryn erekshe dınamıkalyq yrǵaqta beıneleıdi. Qylqalam sheberiniń palıtrasy kúrdeli bolǵanmen, kórermen úshin sújettik kompozısıany jeńil qabyldaýyna múmkindik beredi. Aıtalyq «Aqjar», «Týǵan jer Beriktas», «Jarkent. İle ózeni», «Sýyq saı», «Tekeli taýy», «Keles ózeni», «Kamenka plato» atty týyndylary qorshaǵan álemniń erekshe sulýlyǵyn qanyq jáne kontrast tústerdiń úndestigin ózara úılestire otyryp, tabıǵattyń qasqaǵym sátin máńgilikke aınaldyrady.
Peızaj janrynda ol kórgenin jazyp qana qoımaı, árbir ólkeniń tabıǵatyn zerttep, jete beıneleýinde kórermenniń áserli sezimde sol atmosferany qabyldaýyn jáne este saqtaýyn kózdeıdi. Sýretshi-peızajıst kúndelikti qozǵalystaǵy qubylystyń bir sátke ýaqytty toqtatyp, sol sáttegi sheksiz keńistiktiń máńgilik qundylyǵyn sezinýge múmkindik beredi. Sondyqtan da tabıǵattyń tylsym qubylysyn kórý, seziný jáne áserli jetkizý – sýretshi úshin mańyzdy sát.
– Marat Toteev portrettik janrda da óziniń erekshiligin tanytady. Ol reńkter, tekstýra, jaryq arqyly adam kelbetiniń naqtylyǵyna ǵana emes, beıneniń ishki álemin, sezimin kórsetýge erekshe mán beredi. Shyǵarmashylyǵynda portrettik jumystary tarıh betin qaıta paraqtaýǵa úndeıtin týyndylary oryn alady. Kórmede qoǵamdaǵy orny bar, biraq tarıhta esimi atalmaı qalǵan uly tulǵalardyń biri – etnograf, tarıhshy, áskerı qyzmet atqarǵan Ǵazy Bolatuly Ýálıhannyń, Shoqan Ýálıhanovtyń jubaıy Aısara Kóshenqyzynyń portreti qoıylǵan. Sýretshi tarıhı tulǵalardyń beınesin sýretteı kele, sol ýaqyt belesiniń aqıqatyn kórsetkisi keledi, – deıdi Qasteev mýzeıiniń bólim jetekshisi Gúlnar Jubanıazova.
Sýretshi Marat Muhamedqalıuly – T.Júrgenov atyndaǵy Qazaq ulttyq óner akademıasynyń «Monýmenttaldyq keskindeme» mamandyǵyn tamamdaǵan. Shyǵarmashylyǵyq jolynda «Parasat» redaksıasynda dızaıneri «Býık» fransýz kompanıasynda sýretshi-bezendirýshi, Mýzeefıkasıa, Jambyl aýdany Uzynaǵash aýylyndaǵy Óner mektebinde ustazdyq qyzmetterin atqardy. 2011 jyldan bastap halyqaralyq, respýblıkalyq jáne jergilikti shyǵarmashylyq kórmelerge, sımpozıýmdarǵa qatysyp, ózindik erekshe shyǵarmashylyq týyndylarymen kóptegen alǵys hatpen, «Balalyq shaq dosy», «Óner, mádenıet jáne sport ınstıtýtyna – 50 jyl», «Qurmetti ustaz» medaldarymen marapattalǵan. Sýretshiniń týyndylary Qazaqstan, Qyrǵyzstan, Túrkıa, Germanıa, Kalıfornıa, Úndi koleksıanerleriniń qorynda saqtalǵan.
Marat Toteev kórmesi qańtardyń 25-ine deıin turady.