Bıologıalyq qaýipsizdik problemalary ǵylymı zertteý ınstıtýtyna - 65 jyl.
Búginde elimizdiń veterınarıalyq vırýsologıa, ımmýnologıa, molekýlalyq bıologıa jáne bıologıalyq qaýipsizdik salasynda irgeli zertteýler júrgizip kele jatqan ınstıtýt mamandary 70-ke jýyq bıologıalyq preparat óndirdi, dep habarlaıdy Almaty-akshamy.kz 24.kz-ke silteme jasap.
Olardyń ishinde eń shoqtyǵy bıigi – pandemıa kezinde shyǵarylǵan otandyq QazVac vaksınasy. Osy ǵylymı tabys arqyly Qazaqstan óziniń vaksınasyn ázirlegen álemdegi besinshi memleket retinde tanyldy.
Budan bólek, ınstıtýt ǵalymdary Mańǵystaý oblysynda anyqtalǵan «túıe sheshegine» qarsy ekpe jasap shyǵaryp, sonyń arqasynda aýrý oshaǵy túbirimen joıylǵan bolatyn. Búgin Almatyda irgeli ınstıtýttyń 65 jyldyǵyna oraı álemniń 9 elinen 200-den asa zertteýshi ǵalym bas qosyp, bıologıalyq qaýipsizdik salasyndaǵy jańa ǵylymı jetistikterdi ortaǵa saldy.
«Qazirgi kezde veterınarıa salasynda kóptegen asa qatty juqpaly aýrýlar bar. Sol aýrýlardyń aldyn alý maqsatynda monıtorıńtik zertteýler júrgizedi. Sol aýrýlardyń qalaı damyp jatqanyna, taralyp jatqanyna boljam jasaıdy. Mysaly, qoıdyń qatarly qyzbasy degen aýrý bar. Ol da óte qaýipti aýrýlardyń qataryna jatady. Aýsyl. Mine, sol baǵytta jańa jumystar, jańa zertteýler bastap jatyrmyz», - deıdi «Bıologıalyq qaýipsizdik problemalary» ǴZI zerthana meńgerýshisi Qýandyq Júginisov.