Almatyda Tóle bı dańǵyly men Muratbaev kóshesiniń qıylysynda ornalasqan keńse ǵımaratynyń janynan jaryq shýyldy granata tabyldy, dep habarlaıdy Almaty-akshamy.kz qalalyq polısıa departamentiniń baspasóz qyzmetine silteme jasap.
Polısıanyń málimetine sáıkes, joǵaryda atalǵan aýmaqty aralap júrgen kúzetshi keńse ǵımaratynyń janynan oq-dári tapqan. Oqıǵa ornyna qalanyń shuǵyl qyzmetteri kelip, irgeles aımaqty qorshaýǵa aldy.
Keıinnen saperler habarlaǵandaı, granata tutandyrǵyshsyz jáne adamdarǵa qaýip tóndirmeıtini belgili boldy.
«Almaly aýdandyq polısıa basqarmasynyń jedel tergeý toby tótenshe jaǵdaıdyń mán-jaıyn anyqtaıdy. Aıta keteıik, jaryq shýyldy oq-dáriler - bul adamǵa jaryq shýyldy jáne jaryqshaqty áser etetin, ólimge ákelmeıtin arnaıy quraldar bolyp tabylady», - dep habarlady polısıadan.