Almatyda kólik nómirin jasyrǵan júrgizýshi sottaldy.
Almatyda beınebaqylaý kameralarynan aılasyn asyrmaq bolǵan 27 jastaǵy Toyota Mark II kóliginiń júrgizýshisi ustalyp, sot sheshimimen ákimshilik jazaǵa tartyldy, dep habarlaıdy aqshamnews.kz Polisia.kz-ke silteme jasap.
Súıinbaı dańǵylynda patrúldik polısıa qyzmetkerleri kúdik týdyrǵan kólikti toqtatyp, tekserý barysynda onyń aldyńǵy nómirin jasyryn mehanıkalyq qurylǵy arqyly aýdaryp otyratynyn anyqtady.
— Qalanyń beınebaqylaý júıesi arqyly bul kólikke nazar aýdardyq. Júrgizýshi arnaıy púlttiń kómegimen memlekettik nómirdi aýdaryp, jol qozǵalysy erejelerin óreskel buzǵan. Bul áreket ózge jol qozǵalysyna qatysýshylar úshin qasaqana qaýip tóndirdi. Zańsyzdyqty anyqtaǵan tártip saqshylary kólik ıesin ustady, – dedi Almaty qalalyq PD jergilikti polısıa qyzmeti basqarmasy basshysynyń orynbasary Tımýr Noǵaıbaev.
Sot sheshimimen quqyqbuzýshy QR ÁQBK-niń 590-baby 4-bóligi boıynsha ákimshilik jaýapkershilikke tartyldy. Nátıjesinde ol 3 táýlikke qamaýǵa alynyp, 1 jylǵa kólik júrgizý quqyǵynan aıyryldy. Almaty qalalyq polısıa departamenti azamattardy jol qozǵalysy erejelerin qatań saqtaýǵa shaqyrady jáne zańsyz áreketterden boı tartýǵa keńes beredi.