Almatyda Respýblıka kúni qarsańynda jáne Halyqaralyq nan kúni men Halyqaralyq aspazdar kúnine oraı ulttyq dám-taǵamdarymyzdy nasıhattaý maqsatynda «Baýyrsaq fest» V qalalyq festıvali ótti.
Almaty servıstik qyzmet kórsetý kolejinde uıymdastyrylǵan festıvál salt-dástúrlerimiz ben mádenıetimizdi – urpaqtan-urpaqqa jalǵasyp kele jatqan rýhanı muramyzdy umytpaı, búgingi zamanǵa saı damytyp, jalǵastyryp otyrýǵa úndeıdi.
«Baýyrsaq fest» V qalalyq festıvaline jınalǵan meımandar, stýdentter dastarhan ústine qoıylǵan mol baýyrsaqtan dám tatty. Al oǵan qatysqan mamandar bir ǵana un óniminen baýyrsaq, shelpek pisirip qana qoımaı, «alty qanatty aq ordany», «aq sáldeli atany», «aq kımeshekti ájeni», jaılaý tósindegi tórt túlik maldyń beınesin de, tipti terbetilip turǵan altybaqandy da «pisirgen». Kásibı sheberlikke, sheksiz fantazıaǵa «bárekeldi» demeske amalyń da qalmaıdy.
Festıválde Almaty qalasyndaǵy kolejderdiń oqytýshylary 3 nomınasıa boıynsha saıysqa túsip, «Dástúrli baýyrsaq», «Shı baýyrsaq», «Avtorlyq baýyrsaq» pisirdi. Olardyń baýyrsaqtaryn kásibı naýbaıhana jáne kondıterlik tehnologtardan turatyn qazylar alqasy baǵalady.
Festıvál qorytyndysynda «Dástúrli baýyrsaq» nomınasıasynda jeńiske jetkender: 1-oryn – Araı Almasbek (Týrızm jáne qonaqjaılylyq ındýstrıasy koleji), 2-oryn – Gúldana Isenbaeva (Almaty oblysynyń qyzmet kórsetý jáne tamaqtandyrý salasyndaǵy ınovasıalyq tehnologıalar koleji), 3-oryn – Kámshat Shaldanbaeva (Almaty sán jáne dızaın koleji).
«Shı baýyrsaq» júldegerleri: 1-oryn – Nazgúl Qurmanǵazy (Almaty servıstik qyzmet kórsetý koleji), 2-oryn – Farıda Álmenova (Almaty sán jáne dızaın koleji), 3-oryn – Aıgerim Núsipova (Almaty memlekettik bıznes koleji).
Al «Avtorlyq baýyrsaq» nomınasıasynda qýanyshqa bólengender: 1-oryn – Dınara Kúltaeva (Almaty tehnologıalyq-ekonomıkalyq kllledji), 2-oryn – Aıaýjan Bolat (Almaty servıstik qyzmet kórsetý koleji), 3-oryn – Áıgerim Dıhanova (Almaty memlekettik bıznes koleji).
Tábetti ashar nan ónimderi qoıylǵan erekshe «Art stol» nomınasıasynyń júldegerleri: 1- oryn – Elmıra Maldybaeva, Ulbala Dáýitbek, Aqnur Qýandyqova (Almaty oblysynyń qyzmet kórsetý jáne tamaqtandyrý salasyndaǵy ınovasıalyq tehnologıalar koleji), 2-oryn – Gúljan Imanqulova, Ámına Erjan, Arýjan Qojabek (Almaty servıstik qyzmet kórsetý koleji), 3-oryn – Olesá Otenko, Bota Qanapıanova, Aıaýlym Qýanysh (Týrızm jáne qonaqjaılylyq ındýstrıasy koleji).
«Baýyrsaq» festıvaliniń sońy merekelik konsertke ulasty.
Erulan QARAǴULOV, Almaty servıstik qyzmet kórsetý kolejiniń dırektory:
– «Baýyrsaq» festıvalin eń alǵash osydan bes jyl buryn uıymdastyrǵan edik. Ol kezde tek óz ishimizde ótkizetinbiz. Mine, kórip otyrsyzdar, bıyl aıasy keńeıip, qaladaǵy ózge kolejder ujymy da qatysyp, ónerlerin ortaǵa salyp jatyr. Bul festıválge 100-den astam pedagog, oqýshylar qatysýǵa nıet bildirdi. Almaty qalalyq ákimdiginiń, qalalyq Bilim basqarmasynyń qoldaýymen festıváldiń mártebesiniń bıiktegenine biz de marqaıyp qaldyq. Biz qazaqtyń qonaqjaı bolmysyn nasıhattaǵymyz keledi, osy salada júrgen áriptesterge bir-birimen tájirıbe almasýǵa múmkindik jasaǵymyz keledi. Sol arqyly aspaz mamandyǵynyń mártebesin kóterip, jastarǵa úlgi bolyp, olardy eńbekqorlyqqa baýlý –basty maqsatymyz.