22 jastaǵy I.esimdi qyz ustaldy.
Almatyda banktiń stajer-keńesshisi klıentterdiń shotynan aqsha sheship alǵan, dep habarlaıdy Almaty-akshamy.kz Polisia.kz-ke silteme jasap.
Alaıaqtyq áreketterdi jasaǵany úshin 22 jastaǵy I.esimdi qyz ustaldy. Ol ekinshi deńgeıli bankterdiń biriniń klıentterin aldaǵan.
«Onyń bastapqyda qylmystyq nıetpen bankke stajer bolyp jumysqa ornalasqany anyqtaldy. Ol keńesshi boldy. Onyń fýnksıonaldyq mindetterine klıentterge smartfondaryna mobıldi qosymshany ornatýǵa jáne olardyń bank kartalaryn resýrsqa qosýǵa kómektesý kiredi. Keıbir jaǵdaılarda qaskúnem klıenttiń kamerasy beınetekserýdi qoldamaıtynyn alǵa tartyp, olarǵa óz smartfony arqyly jeke kabınetter ashqan. Bul I.esimdi azamatshaǵa ornatý kezinde paıdalanýshylardyń jeke derekterin skrınshottaýǵa múmkindik berdi. Sodan keıin ol klıentterdiń jeke derekteri men qupıa sózin paıdalanyp, qosymshaǵa kirip, olardyń shottarynan aqshany sheship alǵan. Kóbinese aqshany úshinshi adamdardyń kartasyna aýdarǵan», – dedi Almaty qalalyq PD krımınaldyq polısıa basqarmasynyń bastyǵy Qýatbek Naýatov.
Kúdiktige qatysty QR QK-niń 190-babynda (Alaıaqtyq) kózdelgen qylmys boıynsha qylmystyq is tergelýde. Onyń jeke basynyń basqa da zańsyz áreketterge qatysynyń bar-joǵy tekserilýde.