Importty azaıtý maqsatynda.
Balyq sharýashylyǵy komıtetiniń málimetinshe, byltyr qazaqstandyqtar 128 myń tonna balyq tutynǵan. Onyń 45 myń tonnasy otandyq úlestiń enshisinde, dep habarlaıdy Almaty-akshamy.kz «Habar 24» cilteme jasap.
Al arnaıy fermalarda ósirilgenderi tipti az. Balyq sharýashylyǵy komıtettiń alǵa qoıǵan maqsaty 2030 jylǵa deıin balyq ósirý kólemin 270 myń tonnaǵa jetkizý. Qazir balyq sharýashylyqtaryn qoldaýdyń eki tásili bar.
«Balyq sharýashylyǵy sýbektileri myna qondyrǵylardy, zaýyttardy salyp, toǵandardy qazyp, jańaǵy aqsha jumsasa, sonyń 25 paıyzyn memleket ótep beredi. Bul - birinshi baǵyt. Ekinshi baǵyt - ol jańaǵy balyq ósirý kezinde balyq shabaqtaryn satyp alady, jemderin satyp alady, dári-dármekterin satyp alady. Soǵan jemderge 30 paıyz, al qalǵan sýbsıdıa túrlerine 50 paıyz memleket ótep beredi», - deıdi QR EGTRM Balyq sharýashylyǵy komıteti tóraǵasynyń orynbasary Almas Asylbekov.
Sonymen qatar balyqshylarǵa salynatyn salyq kólemi de 70 paıyzǵa jeńildetilgen. Qazir respýblıkada 300-ge jýyq sharýashylyq bar. Bul - 45 myńnan astam ózen-kóli bar el úshin óte az kórsetkish. Búgin Almatyǵa arnaıy shaqyrylǵan Túrkıa, Polsha men Ózbekstan kásipkerleri óz tájirıbelerimen bólisti.
«Bizdiń qazaq eliniń azamattaryna balyq ósirýdiń durys ekendigin, paıdaly ekendigine kóz jetkizgen jaǵdaıda bul damıdy degen oıdamyz. Negizgi tutynyp otyrǵan balyǵymyz - qazir qyzyl balyq. Al ony ózimiz ósire alatyn bolsaq, bizde Kaspııde ósirýge bolady. Sonymen qatar bizdegi forel úlken deńgeıde ósirse, sony almastyrýǵa bolady. Suranys bar, al Reseı memleketi úlken suranys surap otyr qazir», - deıdi kásipker Marlen Tursynáli.
Balyqqa qajetti jem shetelden ákelinedi. Endi osy kemshilikti túzeý úshin, elimizde balyq jemin jasaıtyn 5 zaýyt salý josparlanyp otyr. Importty azaıtýdyń taǵy bir joly osy. Sonymen qatar, Qapshaǵaı, Balqash pen Kaspııde sharbaq ádisimen balyq ósirý tehnologıasy qolǵa alynbaq.