Balalar 7 kúndik taý daıyndyǵy baǵdarlamasynan ótip, taýǵa órmeleý, taý týrızmi jáne álpınızm elementterin úırenedi.
Qorǵanys mınıstrliginiń aqparatynsha, bolashaq Otan qorǵaýshylar shatyrly lagerdiń turmysyn uıymdastyryp, óz betinshe tamaq daıyndaýdy úırenedi, dep habarlaıdy Almaty-akshamy.kz.
Lagerge birinshi bolyp «Kırov», «Shekara qyzmeti departamentiniń jas shekarashylary» jáne №95 jalpy bilim beretin mekteptiń Borıs Kerimbaev atyndaǵy áskerı-patrıottyq klýbtarynyń tárbıelenýshileri bardy.
« Jazǵy áskerı-dalalyq lagerlerdiń basty maqsaty – jas armıashylardy áskerı-qoldanbaly jáne patrıottyq tárbıeleýdi qamtıtyn balalardyń demalysyn uıymdastyrý», - dep atap ótti №95 jalpy bilim beretin mekteptiń áskerı jetekshisi Baqytjan Pirimbetov.
Lager jumysy Almaty qalasynyń qorǵanys isteri jónindegi departamenti, Almaty oblysynyń Shekara qyzmeti jáne «Jas sarbaz» qozǵalysy departamentimen birlesip uıymdastyryldy.
Taý daıyndyǵy baǵdarlamasyna sáıkes tárbıelenýshilerdiń jas sanatyna baılanysty birneshe shyńǵa mindetti túrde kóterilý kózdelgen.
