№1 balalar úıi tárbıelenýshileri azaıǵandyqtan jabylyp, ornyna Otbasyn jáne balalyqty qorǵaý ortalyǵy ashylǵan edi.
Almatydaǵy Orbıta shaǵyn aýdanynda qaraýsyz qalǵan burynǵy Balalar úıi maskúnemderdiń mekenine aınalǵan, dep habarlaıdy Almaty-akshamy.kz
Qazir bul ǵımarattyń saý tamtyǵy qalmapty. Negizgi másele bul emes. Jergilikti turǵyndardyń alańdap otyrǵany balalarynyń qaýipsizdigi. Óıtkeni keshqurym ýaqytta munda maskúnemder, nashaqorlar jınalatyn kórinedi. Sondyqtan jazǵy demalys kezinde balalarymyz bir nársege arandap qala ma dep ata-analar ýaıymdap otyr.
№1 balalar úıi birneshe jyl buryn tárbıelenýshileri azaıǵandyqtan jabylyp, ornyna Otbasyn jáne balalyqty qorǵaý ortalyǵy ashylǵan edi. Kóp uzamaı ol da jumysyn toqtatty. Sodan beri mekeme bos tur.
Aýmaǵy shamamen 20 myń sharshy metrdi alyp jatqan bul ǵımarattyń qańyrap bos turǵanyna da 3 jyldaı ýaqyt bolypty. Almatyda balabaqsha men mektep jetispeıdi. Orbıta sekildi yqsham aýdandarda tipti qurylys jumystaryn júrgizetin bos oryn joq. Al daıyn turǵan ǵımarattyń ne úshin qaraýsyz qalǵanyn turǵyndar túsine almaı álek.
«Ǵımarat Almaty qalasy qurylys basqarmasynyń balansynda. Jáne de Almaty qalasynyń qurylys basqarmasy 2021 jyly jeltoqsan aıynda jobalyq-smetalyq qujattama daıyndaý jumysy bastaldy. Búgingi kúnde oń sheshim ekspertızasy alyndy. Jáne de jaqyn arada búdjettik usynys qalalyq máslıhatqa beriledi. Aqsha bólingen jaǵdaıda konkýrstyq rásimder júredi», - deıdi Almaty qalasy qurylys basqarmasy basshysynyń orynbasary Aıdar Nurǵojaev.
Ákimdik ókiliniń aıtýynsha bul jerde 480 oryndyq balabaqsha bolady. Konkýrstyq rásimder aıaqtalsa qyrkúıek aıynda qurylys bastalyp, kelesi jyldyń sońynda aıaqtalady dep otyr.