Bul týraly Almaty ákimi Erbolat Dosaev Úkimettiń keńeıtilgen otyrysynda málim etti.
Memleket basyshysynyń qatysýmen ótken Úkimettiń keńeıtilgen otyrysynda Almaty ákimi Erbolat Dosaev qala halqynyń ómir sapasyn arttyrý men áleýmettik ınfraqurylymdy damytý jumystyń basymdyq berilgen baǵyty ekenin atap ótti, dep habarlaıdy Almaty-akshamy.kz
«Qala halqy sanynyń ósýi aıasynda oqýshylar ornynyń jetispeýshiligi kúrdeli másele bolyp otyr. Ótken jyly Almatyda 33 jańa mektep iske qosyldy, onyń 6-ýynda 15 719 jańa oqýshy ornyn ashylyp, sonyń arqasynda oryn tapshylyǵyn 46 paıyzǵa azaıtý múmkin boldy. Bıylǵy jyldyń 1 qańtaryndaǵy jaǵdaı boıynsha qalada 19 611 oqýshy orny jetispeıdi», - dep atap ótti qala ákimi.
Bul máseleni sheshý maqsatynda 2022 jyly 46 orta bilim berý nysanynyń qurylysy jalǵasady, onyń ishinde 14245 oryndyq 22 nysan jyl sońyna deıin paıdalanýǵa beriledi.Prezıdent Q.Toqaev jarıalaǵan Balalar jyly aıasynda balabaqsha kezegin azaıtý úshin Almatyda 10 340 oryndyq 82 mektepke deıingi mekeme ashý jumystary bastaldy. Qazirdiń ózinde 2022 jyly 6560 oryndyq 60 jekemenshik balabaqsha men 2 memlekettik balabaqsha ashý josparlanýda. Sondaı-aq balalarǵa qosymsha bilim berý úshin memlekettik tapsyrys 73 147 orynǵa keńeıtilip, 2 zamanaýı Inovasıalyq shyǵarmashylyq ortalyǵynyń qurylysy, 4 oqýshy úıin jańǵyrtý jumystary bastalady.
«Búginde 207 memlekettik mekteptiń barlyǵy qaýipsizdik talaptaryna sáıkes kelmeıdi. Bilim berý uıymdarynda qaýipsizdikti qamtamasyz etý úshin biz osy naýryz aıynda 2 jyldyq baǵdarlamany qabyldaýǵa nıettimiz, ony iske asyrý nátıjesinde 2023 jyldyń 1 qyrkúıegine deıin qalanyń barlyq mektepterinde beınebaqylaý kameralaryn aýystyrý, týrnıketter men dabyl túımelerin ornatý máseleleri tolyq sheshiletin bolady», - dedi Erbolat Dosaev.