«El erteńi» qoǵamdyq qory almatylyqtardy táýelsiz baqylaýshy bolýǵa shaqyrady.
Almatyda «El erteńi» qoǵamdyq qorynyń uıymdastyrýymen baspasóz konferensıasy ótti. Onda uıym músheleri el azamattaryn, ásirese, jastardy ózderiniń belsendilikterin kórsetip, aldaǵy Májilis saılaýynda baqylaýshy bolýǵa shaqyrdy, dep habarlaıdy Almaty-akshamy.kz
- «Aldaǵy saılaýda baqylaýshy bolýǵa óz uıymymyzǵa adamdardy jınaıyn dep jatyrmyz. 18 jastan asqan kez kelgen Qazaqstan azamaty bizdiń uıymǵa kelip, baqylaýshy retinde qosyla alady. Bizdiń maqsatymyz – aldaǵy saılaýdyń ádil ótýin qamtamasyz etý. Ótken Prezıdent saılaýynda ózim de baqylaýshy bolyp qatystym. Endi osy saılaýǵa bizdiń uıymnyń atynan alǵash ret baraıyn dep otyrǵan jas baqylaýshylarǵa óz tájirıbemdi bólisemin», - dedi «El erteńi» uıymynyń múshesi, jas muǵalim Sultan Aıtbaev.
- «El erteńi» uıymy buǵan deıin de saılaýlarǵa atsalysqan bolatyn. Endi elimizdiń jas azamaty, belsendi retinde aldaǵy Májilis pen máslıhat saılaýynda da óz úlesimizdi qosqymyz kelip otyr. Saılaý ýchaskelerinde bilmestikten ártúrli máseleler týyndap jatady. Biz osyndaı jaǵdaılardyń aldyn alǵymyz keledi. Bizdiń uıymǵa júgingen jastardy aldaǵy ýaqytta arnaıy oqytamyz. Saılaýdyń óziniń erejeleri bar. Biz sol erejelerdi jáne barlyq talap-mindetterdi tanystyryp, quqyqbuzýshylyqtyń aldyn alýǵa jumys isteıtin bolamyz. Sonymen qatar, uıymǵa qosylǵan ár azamatqa kýálandyratyn kýálik beremiz», – dedi «El erteńi» uıymynyń belsendisi, Phd maman Baızaq Maqsat.
«Bizdiń uıym Prezıdent saılaýy kezinde Almatynyń 8 aýdany boıynsha barlyq saılaý ýchaskelerin qamtydy. Bul joly da qalamyzdyń 500-den astam ashyq saılaý ýchaskelerine kemi bir baqylaýshydan jiberýdi josparlap otyrmyz. Biz uıymǵa qabyldaýdy áli bastamasaq ta, ótken saılaýda qatysyp, osy joly da baqylaýshy bolamyn dep jatqan jastar kóp», – deıdi uıym belsendisi Dıdar Qurman.