Almaty ákimdigi baǵa turaqtylyǵyn saqtap, tutyný naryǵyndaǵy jaǵdaıdy turaqtandyrý boıynsha júıeli jumys júrgizip keledi, dep habarlaıdy aqshamnews.kz
Bul týraly Óńirlik komýnıkasıalar qyzmetinde ótken brıfıńte qala ákiminiń orynbasary Oljas Smaǵulov málimdedi.
Qyrkúıek qorytyndysy boıynsha Almatydaǵy jyldyq ınflásıa deńgeıi – 13,2%. Bul kórsetkish ortasha respýblıkalyq deńgeıden sál ǵana joǵary. Al azyq-túlik taýarlarynyń qymbattaýy el boıynsha eń tómengi kórsetkishtiń biri – 9,2%.
Qalada halyq tabysyn qorǵaýǵa baǵyttalǵan birqatar is-sharalar qolǵa alynǵan. Atap aıtqanda, sýmen qamtý, sý burý, elektr jáne jylýmen qamtý tarıfteri tómendetildi.
Baǵany turaqtandyrý baǵdarlamasy aıasynda jetkizýshilermen tikeleı kelisimsharttar jasalyp, demalys kúngi jármeńkeler men fermerlerden ónim jetkizý arnalary keńeıtildi.
Basty maqsat – almatylyqtardyń satyp alý qabileti men ómir súrý deńgeıin saqtaý.