Qala ákiminiń orynbasary Oljas Smaǵulovtyń aıtýynsha, qaladaǵy qurylysta sapasyz jumysqa jol berilmeıdi, dep habarlaıdy aqshamnews.kz
Almaty ákimdigi memlekettik satyp alýǵa qatysatyn merdiger uıymdarǵa qoıylatyn talaptardy kúsheıtip otyr. Qala basshylyǵy merzimdi buzatyn, standartty saqtamaıtyn jáne mindettemelerin oryndamaıtyn kompanıalardyń jolyn kesedi. Bul týraly Almaty Óńirlik komýnıkasıalar qyzmetinde ótken brıfıńte habarlandy.
«Bizdiń ustanymymyz aıqyn ári qatań: Almatyda tek jaýapty merdigerler jumys isteýge tıis. Jeńil paıda tabýǵa, sapasyz jumys isteýge kelgenderge munda oryn joq. Biz adal bıznesti qoldaımyz, al tártip buzǵandarǵa eń qatań shara qoldanamyz», – dedi qala ákiminiń orynbasary Oljas Smaǵulov.
2025 jyly toǵyz aıda Almatyda Biryńǵaı satyp alý uıymdastyrýshysy jalpy quny 750 mıllıard teńgeden asatyn 1 274 baıqaý ótkizgen. Onyń basym bóligi qurylys jáne ınfraqurylymdyq jobalarǵa tıesili. Alaıda keıbir merdigerler belgilengen kólemmen jumys isteýge qaýqarsyz bolyp, ne tapsyrystardy úshinshi tulǵalarǵa berip, nátıjesinde jumys kestesiniń buzylýyna sebep bolyp otyr.
Respýblıkalyq deńgeıde satyp alý erejelerine ózgerister engizildi: endi merdigerlerdi irikteý kezinde olardyń oryndaǵan jobalarynyń kúrdeliligi eskeriledi. Bul tájirıbe kezdeısoq nemese álsiz kompanıalardyń qatysýyn shekteıdi. Sonymen qatar qala ákimdigi jaýapkershilikti arttyrý jóninde usynystar joldady: mindetine salǵyrt qaraǵan jetkizýshiler tiziminde bolý merzimin uzartý men aıyppul mólsherin ulǵaıtý kózdelgen.