Baǵanyń negizsiz ósýine jol bermeý úshin otandyq taýar óndirýshilermen jumys júrgizilýde.
Almaty ákimi Erbolat Dosaevtyń tóraǵalyǵymen memlekettik organdar men azyq-túlik saýda nysandarynyń ókilderimen jumys keńesi ótti, dep habarlaıdy Almaty-akshamy.kz
Almatynyń kásipkerlik jáne ınvestısıalar basqarmasynyń málimetinshe, qazirgi ýaqytta azyq-túlik taýarlarynyń baǵasyn turaqtandyrý maqsatynda aýdandyq ákimdiktermen birlesip, saýda jelileriniń, bazarlar men «úı janyndaǵy» dúkenderdiń sórelerindegi baǵalarǵa kúndelikti monıtorıń júrgizilýde. Sońǵy aptada kókónis ónimderine baǵanyń shamaly aýytqýynan basqa, ÁMAT baǵasynyń kúrt ósýi baıqalmady, bul ónimdi saqtaý shyǵyndarymen baılanysty.
Baǵanyń negizsiz ósýine jol bermeý úshin otandyq taýar óndirýshilermen jumys júrgizilýde. Tıimdi tetikterdiń biri «jeńildetilgen» zaemdar berý baǵdarlamasy bolyp tabylady, onyń aıasynda óndirýshiler men saýda jelilerine baǵany uzaq merzimge belgileý úshin paıyzsyz «aınalymdy» qaryzdar beriledi. Búginde osy baǵdarlama aıasynda jumyrtqa óndiretin iri «Alsad Qazaqstan» JSHS-men (naryq úlesiniń 30%-yn alady) kelisim jasaldy, 2024 jylǵy 31 qańtarǵa deıin ótkizý baǵalary boıynsha on jumyrtqanyń baǵasy 400 teńge deńgeıinde tirkeldi. Kelisimniń qoldanysqa enýinen bastap jumyrtqa baǵasyn turaqtandyrý boıynsha oń nátıje baıqaldy, ıaǵnı on jumyrtqanyń baǵasy 487-den 462 teńgege deıin tómendedi.
Jeńildetilgen zaemdar aǵymdaǵy jyldyń sáýir aıynyń sońyna deıin baǵany turaqtandyrý úshin «Magným» (ÁMAT 19 ataýyna 5,7 mlrd teńge) jáne «Toımart» (ÁMAT 12 ataýyna 430,2 mln teńge) saýda jelilerine berildi. Ónimdi aldyn ala satyp alý esebinen "Magným" jelisindegi bólshek saýda baǵasy ortasha qalalyq baǵadan 10-15%-ǵa tómen. Mysaly, «Magnýmda» qanttyń bir kılosy 265 teńge, al ortasha naryqtyq baǵa 360 tg/kg-ǵa deıin jetedi. Egin jınaý maýsymynda fermerlerden kókónisterdi tómen baǵamen satyp alý esebinen maýsymaralyq kezeńde (2021 jylǵy qyrkúıekten 2022 jylǵy sáýirge deıin) sóredegi baǵa naryqtyq baǵadan 30%-ǵa deıin tómen deńgeıde tirkeldi.
Keńestiń jumysyn qorytyndylaǵan Almaty ákimi Erbolat Dosaev basqa saýda jelileriniń ókilderin jeńildetilgen «aınalym» qaryzdaryn berýdiń qalalyq baǵdarlamasyna belsendi qatysýǵa shaqyrdy, sondaı-aq iri naryq ókilderin baǵanyń negizsiz kóterilýine jol bermeý týraly eskertti.
«Deldaldyq syzbalardy» tekserý jóninde komısıa qurý týraly sheshim qabyldandy. Komısıa aıasynda azyq-túlik taýarlaryn óndirýshiler men jetkizýshilerge saraptama júrgizý, qaıta satyp alýshylar tizbegin anyqtaý jáne tyıý, ÁMAT baǵalaryna monıtorıńti kúsheıtý, saýda ústemesiniń 15%-dan asýy anyqtalǵan jaǵdaıda tıisti sharalar qabyldaý qajet», - dep atap ótti Erbolat Dosaev.
Qala basshysynyń aıtýynsha, Almaty oblysyndaǵy áriptestermen birlese otyryp, «Altyn Orda» iri bazarynda «deldaldyq syzbalardy» anyqtaý boıynsha óńiraralyq komısıa qurylady, ol jerden megapolıske 80%-ǵa deıin kókónis, jemis-jıdek pen et jetkiziledi. Basty mindet – azyq-túlik taýarlarynyń baǵasyn ustap turý jáne ınflásıalyq prosesterdi tómendetý jónindegi jumysty kúsheıtý.