Almaty qalasynyń Ekologıa jáne qorshaǵan orta basqarmasy Polısıa departamentimen jáne Tabıǵat qorǵaý prokýratýrasymen birlesip, jyljymaly ekologıalyq zerthanany jáne 3 jyljymaly ekologıalyq beketti tarta otyryp, Almaty qalasynyń aýa baseınin lastaýdyń negizgi kózi bolyp tabylatyn avtomobılderdiń paıdalanylǵan ýly gaz ben tútininiń deńgeıin ólsheý boıynsha reıd jumystary júrgizilýde.
Júk, jeńil avtokólikter men avtobýstar tekserilýde. Almaty qalasy ákimdiginiń 2023 jylǵy 1 aqpandaǵy №1/56 qaýlysymen bekitilgen Avtomobıl kólik quraldarynan shyǵaryndylardy ólsheýdi júzege asyrý jónindegi qaǵıdalarǵa sáıkes paıdalanylǵan gazdardyń ýyttylyǵy men tútininiń belgilengen normalarynyń saqtalýyna monıtorıń júrgiziledi, dep habarlaıdy Almaty-akshamy.kz.
Benzın qozǵaltqyshtary bar avtomobılderdiń paıdalanylǵan gazdaryn ólsheý kómirsýtekterdiń, kómirtegi oksıdiniń, kómirqyshqyl gazynyń, otteginiń quramyna sertıfıkattalǵan «AVTOTEST-02.03» kóp komponentti gaz analızatorlarymen júrgiziledi. Dızeldi kólikterdiń paıdalanylǵan gaz tútinin META-01 MP 0.1(LTK,K) ólshegishiniń kómegimen tekseriledi.
Shyǵaryndylarda lastaýshy zattardyń bolý normatıvterin buzǵany úshin kólik quraldarynyń ıeleri QR ÁQBtK–niń 334-baby («Shyǵaryndylarda lastaýshy zattardyń bolý normatıvterin asyra otyryp, avtomotokólikterdi jáne basqa da jyljymaly quraldardy paıdalaný») boıynsha ákimshilik jaýapkershilikke tartylady, oǵan sáıkes jeke tulǵalarǵa-10 AEK, zańdy tulǵalarǵa-100 AEK mólsherinde eskertý nemese aıyppul kózdelgen. Jyl ishinde qaıtalanǵan jaǵdaıda avtokólik ıelerine jeke tulǵalarǵa – 20 AEK, zańdy tulǵalarǵa - 200 AEK mólsherinde aıyppul salynady.
2023 jyly qalanyń perımetri boıynsha ornalasqan 19 stasıonarlyq ekopostta shamamen 213 011 ólsheý jumystary júrgizildi (benzın qozǵaltqyshymen - 206 492, dızel qozǵaltqyshymen – 6 519), olardyń ishinde ýly gaz ben tútinniń belgilengen deńgeıiniń artýy barlyq tekserilgen avtomashınalardyń 15,4% anyqtaldy.
2023 jyly Almaty qalasy Polısıa departamentiniń qyzmetkerleri 26 myńǵa jýyq ákimshilik hattama jasady, onyń ishinde:
- QR ÁQBtK-niń 334-baby 1-bóligi boıynsha (eskertý) - 20 382 ákimshilik hattamalar;
- QR ÁQBtK-niń 334-baby 1-bóligi boıynsha (aıyppul) - 4 482 ákimshilik hattamalar;
- QR ÁQBtK-niń 334-baby 2-bóligi boıynsha (aıyppul) - 864 ákimshilik hattamalar;
- Jalpy somasy 207 414 000 teńgege aıyppul esepteldi, onyń ishinde 145 272 765 teńge (70% óndirip alý) óndirildi.