Aılardyń sultany Ramazanǵa da jettik. Al bul aıda oraza ustaý – deni saý balıǵat jasyna tolǵan árbir musylmanǵa paryz.
Aýyz bekitken musylman sáresin úıinen iship shyqqanmen, qalanyń qarbalas sharýasymen, qaptaǵan kólik keptelisimen aýyzasharda úıine jete almaýy da múmkin. Nemese oraza tutqan jaqyndaryna aýyzashar berýge nıettenip, biraq úıinde qonaq kútýge ýaqyty, murshasy bola bermeıtinder de bar. Osyndaı kezde qoǵamdyq tamaqtandyrý oryndaryna júginýge týra keledi.
Almatyda ne kóp, kafe men restoran kóp. Almaty aqshamy saıtynyń tilshisi solardyń birshamasyna habarlasyp, ramazan aıyndaǵy aýyzashar baǵasyn bilgen edi. Qalamyzda tamaqtanatyn oryn kóp bolǵanymen, olardyń keıbiri orazaǵa arnap mázir qurmapty (Biz negizinen eýropa asqanasyn daıyndaıtyndarǵa emes, shyǵys asqanasyna arnalǵan oryndarǵa habarlastyq).
Qalamyzdyń Jibek joly dańǵylynda ornalasqan «Pampooshka» atalatyn restoranda ramazanǵa arnalǵan set 3150 teńgeden bastalady eken. Biz habarlasqan oryndardyń ishindegi eń arzany osy boldy.
Al Iassaýı kóshesindegi «Iftar» lagmanhanasynyń ókili aýyzashar baǵasy kisi basyna 6-7 myń teńge dep jaýap berdi.
Almatynyń birneshe jerinde ornalasqan «Túbeteıka» shyǵys shaıhanasynyń Abylaıhan dańǵylyndaǵy fılıaly orazaǵa arnaýly mázirimiz joq, kúndelikti menú boıynsha tapsyrys qabyldaımyz dedi. Bul jerdiń ortasha chegi adam basyna 10-12 myń teńge kóleminde.
Abaı dańǵylyndaǵy «Qaimaq» restoranynyń aýyzashar máziri tómendegideı, baǵasy kórsetilgen.
Áýezov kóshesiniń boıyndaǵy «Ipar» halal asqanasynyń admınıstratorynyń aıtýynsha, mundaǵy baǵa adam basyna 5 myń teńgedeı bolady eken.
Jeltoqsan kóshesinde ornalasqan «Sydyq» restorany ókiliniń aıtýynsha, ortaq zalda tamaq ishý úshin aýyzashar máziri adam basyna 9800 teńge eken, nemese kúndelikti menúden satyp alýǵa da bolady.
Ishtvan Qońyr kóshesindegi «Panorama» meıramhanasy ramazanǵa arnap 2 túrli mázir ázirlepti.
«Dostyq» yqshamaýdanyndaǵy «Avat» meıramhanasynda aýyzashar baǵasy adam basyna 7500 teńge turady eken.
Oraza tutýshynyń aýyz ashý ýaqyty aqsham namazynyń ýaqyty, ıaǵnı kúnniń batýymen baılanysty. Aýyzashar berý – saýapty is. Záıd ıbn Halıd ál-Jýhaınıdiń (r.a.) rıýaıaty boıynsha Paıǵambarymyz (s.ǵ.s.): «Aýzy berik jandy aýyzasharǵa shaqyryp tamaq bergen kisi – oraza ustaǵan adamnyń alatynyndaı saýap alady. Aýzy berik adamnyń saýabynan da esh nárse kemimeıdi», – degen. (Tırmızı, Saým, 82; Ibn Majá, Sıam, 40).
Taǵy bir hadısinde Paıǵambarymyz (s.ǵ.s.): «Eger kimde-kim Ramazan aıynda adal tabysymen aýyzashar berse, perishteler Ramazan aıynyń sońyna deıin oǵan duǵa jasaıdy», – degen. Sonda rıýaıat etýshi: Ýa, Rasýlalla! Aýyzasharǵa eshteńe tappasa ne isteıdi? – dedi. – «Bir tilim nan bersin» – dedi. – «Ol da bolmasa she?» – «Onda qara sý bersin» – dedi (át-Tarǵıb ýát Tarhıb, 2/431.) Oraza tutqan kisige bir qurma nemese bir kese sút bergen adam da aýyzashar bergendeı saýapqa ıe bolady.
Ramazan aıy qutty, ustaǵan orazalaryńyz qabyl bolsyn!