Almatyda aýrýhanalar men jeke úılerde urlyq jasap júrgen áıel ustaldy.
Bótenniń múlkin urlaý áreketterin jasady degen kúdikpen 46 jastaǵy jergilikti turǵyn ustaldy, dep habarlaıdy Almaty-akshamy.kz Polisia.kz-ke silteme jasap.
«Tergeý anyqtaǵandaı, G.esimdi azamatsha oqtyn-oqtyn qylmystyq áreketpen aınalysqan, onyń basqa tabystary bolmaǵan. Sońǵy kezderi emdeý mekemelerinde oryn alǵan urlyq týraly aryzdar jıilep ketti. Qaskóı kabınetter men palatalarǵa kirip, qaraýsyz qalǵan zattardyń barlyǵyn: uıaly telefondar, ámıandar, túrli gadjetterdi ıemdengen. Al aýrýhanalardyń birinde ol tondy urlap ketken. Birneshe epızod beınebaqylaý kameralaryna túsip qalǵan. Barlyq derekter boıynsha qylmystyq ister tirkeldi. Qazir kúdikti qamaýǵa alyndy», — dedi Naýryzbaı aýdandyq polısıa basqarmasynyń bastyǵy Dıdar Ahanov.
Tergeýdiń osy kezeńinde G.esimdi azamatshanyń osyǵan uqsas jeti epızodqa qatysy bar ekendigi anyqtaldy. Áıel adam urlanǵan telefondar men basqa da gadjetterdi satyp, satýdan túsken aqshany óz qalaýy boıynsha jumsaǵan.
«Ustalǵan azamatsha óz kinásin moıyndap, barlyq qylmystarǵa qatysy bar ekenin rastady. Biz kúdiktiniń basqa da osyǵan uqsas qylmystarǵa qatysy bar-joǵyn tekserip jatyrmyz. İstiń tolyq jáne jan-jaqty tergelýin qamtamasyz etýge baǵyttalǵan birqatar tergeý áreketteri júrgizilýde, nátıjesinde bul qylmystyq is sotqa joldanatyn bolady», – dedi Ahanov.