Mamandardyń málimetinshe, bul qubylys birqatar meteorologıalyq faktordyń toǵysýymen baılanysty, dep habarlaıdy aqshamnews.kz
Sınoptıkterdiń habarlaýysha, 1 shilde kúni elimizdiń úsh qalasynda atmosferada lastaýshy zattardyń joǵary mólsherde jınalýy kútiledi. Olar atmosferanyń tómengi qabatynda zıandy qospalardyń jınalyp, taralmaı qalýyna sebep bolady.
«2025 jylǵy 1 shildede Almaty, Aqtóbe qalalarynda jáne túnde Astana qalasynda qolaısyz meteorologıalyq jaǵdaılar kútiledi», – delingen resmı habarlamada.
Qolaısyz meteojaǵdaılar – bul aýanyń lastanýyna ákeletin tabıǵı qubylystar. Olarǵa mynalar jatady:
tymyq aýa raıy;
baıaý soǵatyn jel;
tuman;
temperatýralyq ınversıa (jer betine jaqyn aýa qabatynyń jylyraq bolýy).
Bul qubylystar zıandy zattardyń aýada taralýyna kedergi keltirip, olardyń shoǵyrlanýyna jol ashady. Ásirese, bul tyǵyz salynǵan turǵyn aýdandar men ónerkásiptik aımaqtarda baıqalady.
Qaýip nede?
Aýa sapasynyń ýaqytsha nasharlaýy tynys alý organdaryna keri áser etip, ásirese balalar, qarttar jáne sozylmaly aýrýy bar adamdar úshin qaýipti bolýy múmkin. Osyndaı kúnderi ashyq aýada uzaq ýaqyt bolýdan aýlaq bolǵan jón, ásirese tańǵy jáne keshki ýaqyttarda.