Kúdiktige qatysty qazirdiń ózinde 10 aryz-shaǵym túsken.
Almaty polısıasy Naýryzbaı aýdandyq Polısıa basqarmasynyń bastamasymen áskerı qyzmetshilerdiń atyn jamylyp alaıaqtyq qylmys jasap júrgen adam týraly eskertedi, dep habarlaıdy Almaty-akshamy.kz Polisia.kz-ke silteme jasap.
«Bizdiń jedel qyzmet bólimderiniń qyzmetkerleriniń zerdeleýine sáıkes sońǵy ýaqytta túrli turmystyq zattardyń satylýy jaıly jarnama berip júrgen áskerı formadaǵy azamatqa aldanyp qalǵandar sany artyp keledi. Barlyq jaǵdaıda alaıaq óziniń qyzmet babymen basqa qalaǵa aýysyp jatqandyǵyn jeleý etip, turmystyq tehnıkamen úı zattaryn saýdalap, olardan taýar aqshasyn tolyq aýdarýdy suraǵan. Satyp alýshylar kúdigin týdyrmas úshin ol óziniń áskerı formadaǵy kıimimen túsken sýretin, qujattaryn jibergen. Tek qana Almaty qalasynyń ózinde kúdiktige qatysty 10 aryz-shaǵym tirkelip otyr», – dedi Almaty qalasy Naýryzbaı aýdandyq Polısıa basqarmasynyń bastyǵy Danıar Meńdebaev.
Osy oraıda Almaty polısıasy azamattardyń óte saq bolýlaryn suraıdy. Eger kez kelgen taýar satyp alý barysynda Volohov Aleksandr Vıktorovıch esimdi áskerı formadaǵy adamǵa tap bolsańyz, dereý polısıaǵa habarlasyńyz.