Halyqaralyq áıelder kúni qarsańynda Almaty garnızonynyń áskerı qyzmetshileri maıdangerler – Olga Andreevna Savenko men Ekaterına Aleksandrovna Baranovaǵa bardy, dep habarlaıdy aqshamnews.kz Qorǵanys mınıstrligine silteme jasap.
Búgin názik jandy, qaısar rýhty áıelderge erligi men jeńiske qosqan úlesi úshin quttyqtaýlar men jyly lebizder aıtyldy. Maıdangerlerdi Radıoelektronıka jáne baılanys áskerı-ınjenerlik ınstıtýtynyń bastyǵy general-maıor Nurtas Qabaqov, Almaty qalasy qorǵanys isteri jónindegi departamentiniń bastyǵy polkovnık Talǵat Ózehan jáne «Qarýly Kúshterdiń ardagerleri» RQB Almaty fılıalynyń tóraǵasy otstavkadaǵy polkovnık Tólegen Mustafın quttyqtady. Olar olarǵa Qorǵanys mınıstriniń atynan quttyqtaý hatyn berip, ózderiniń atynan estelik syılyqtar tabys etti.
Áskerı orkestrdiń súımeldeýimen soǵys jyldaryndaǵy ánder shyrqaldy. Ardagerler áskerı qyzmetshilerdiń jyly tilekterin shyn júrekten qýana qabyldady. Maıdangerler soǵys jaıly jáne soǵystan keıin ómir qalaı bastalǵany týrasynda estelikterin áńgimelep berdi.
– Ardagerlerimizdiń ómir joly – patrıotızmniń bastaýy, ósip kele jatqan urpaq úshin batyldyq pen tabandylyqtyń úlgisi. Olar soǵystyń eń aýyr synaqtarynan abyroımen ótti. Búgingi bizdiń mindetimiz – olarǵa qamqor bolyp, janqıar eńbekteri úshin alǵysymyzdy bildirý jáne máńgi jadymyzda saqtaý, – dep atap ótti áskerı bilim ordasynyń bastyǵy general-maıor Nurtas Qabaqov.
Osy jyldyń maýsym aıynda Ekaterına Aleksandrovna Baranova ǵasyrlyq mereıtoıyn atap ótedi. Ol Kýrsk oblysynda dúnıege kelgen. Jasóspirim kezden-aq adamdarǵa kómektesýge tyrysty, sondyqtan ol medısınalyq kolejge tústi. 1943 jyly ásker qataryna shaqyrylyp, aýrýhanaǵa jiberilip, onda jaralanǵan sarbazdardy emdedi. Jeńisti Chehoslovakıa jerinde qarsy aldy. Soǵystan keıin kúıeýimen birge Almatyǵa kóship keldi. Kóptegen jyldar boıy Ekaterına Aleksandrovna naýqastarǵa qamqorlyq jasap, medbıke bolyp jumys istedi.Olga Andreevna Savenko 9 mamyrda Jeńis kúnin ǵana emes, 102-shi týǵan kúnin de atap ótedi. Ol 1923 jyly Almatyda dúnıege kelgen. 18 jasynda Lenıngrad áskerı baılanys ýchılıshesin bitirip, birden maıdanǵa attandy. Birinshi Belarýssıa maıdanynda 109-shy jeke baılanys polkiniń quramynda ol Berlınge deıin soǵysqa qatysty. Soǵystan keıin týǵan jerine oralyp, 57 jyldan astam ýaqyt telegrafta jumys istedi. Zeınetke 73 jasynda shyqty.
Búginde Almatyda Uly Otan soǵysynyń 24 ardageri, onyń ishinde 6 maıdanger áıel bar. Almaty garnızonynyń áskerı qyzmetshileri olarǵa únemi kelip, qoldap turady.