Almatyda sýretshi Roza Beksultanovanyń «Shyǵys palıtrasy» kórmesi ótýde
Roza Beksultanova ózin balalarǵa rıasyz sýret salýdy úıretetin art-terapevt sýretshisi dep tanystyrdy. Ol Almaty Gallery kórkemsýret galereıasynda óziniń alǵashqy kórmesin usyndy, dep habarlaıdy Almaty-akshamy.kz.
Jas qylqalam sheberi mamandyǵy boıynsha kostúm sýretshisi bolǵanymen, ustazdyq joldy tańdaǵan. Alǵashynda balabaqshada sabaq berip, keıin jubaıymen birge stýdıa ashqan.
«Men art-terapıa salasynda 9 jyldan astam ýaqyt qyzmet etip kelemin. Stýdıa ashqanyma jeti jyl toldy. Bul - meniń alǵashqy jeke kórmem. Munda usynylǵan kartınalar kóp emes, alaıda árqaısysy mán-maǵynaǵa toly dúnıe. Tanymal kartınalardyń ulttyq naqyshta jandanýy desem de bolady. Sýretterdiń kóbisinde áleýmettik máseleler kóterilgen jáne ony ár adam árqalaı túsinedi. Men tanymal, eldiń nazarynda júrgen kartınalardy ózgertý arqyly qoǵamnyń túıtkildi máselelerin kórsetkim keldi», - dedi Roza Beksultanova.
Sýretshi óziniń alǵashqy jeke kórmesinde Matıss, Klımt, Pıkasso, Bottıchellı, Van Gog kartınalaryn qaıta tiriltip, olarǵa qazaqı dem bergen.
Kórmeniń basty kartınasy – Matısstiń «Bı» kartınasy negizinde salynǵan «Basty mamandyqtar» sýreti. Onda aqsha usynyp otyrǵan balany aınala onyń jaqyndary: anasy men ákesi, aq halatty abzal jan, polısıa qyzmetkeri, ustazy beınelengen. Iaǵnı balanyń ósip-ónýin, qaýipsizdigin qamtamasyz etý úshin kerek jandar. Alaıda bizdiń qoǵamnyń qazirgi ashshy shyndyǵy – aqshasyz qarapaıym qajettilikterdi alýdyń ózi qıyn. Munyń barlyǵy - sýretshiniń jeke janaıqaıy.
«Bul kartınany jazarda meni úreı basqany ras. Alaıda jubaıym men uıymdastyrýshylardyń arqasynda kartına búgingi kórmeniń tórinde tur. Pıkassonyń «Uıqy» kartınasy jelisinde salynǵan sýretti «Ómirińdi erteńge qaldyrma» dep atadym. Men úshin bul sóz tirkesi – búgingi kórmeniń urany. Eger ómirińizdi ózgertkińiz kelse, qoryqpańyz, búginnen bastańyz, keıin bári kesh, oılaǵanyńyz esh ketýi múmkin», - dep túsindirdi avtor.
Jas sýretshi úshin qazaqsha oıý-órnekteri bar kórpeshe jaıylǵan oryndyq beınelengen «Seniń jolyń» atty kartına bárinen ystyq eken. Sebebi sýretshi óziniń kim ekenin janǵa jylylyq syılaıtyn osy sýret arqyly túsingen.
«Sýretshilerdiń kóbi óner jolymen júrýden qorqady, men osy keskindeme boıynsha jumysymdy aıaqtaǵannan keıin sýretshi bolý naqty maqsatym ekenin túsindim. İshteı bir ózimdi endi naǵyz sýretshimin dep aıta alamyn degen oıǵa keldim. Men sýret salý kezinde akrıl men maıly boıaýdy qoldanamyn. Meniń stılim – jarqyraǵan túster men boıaýlar, qalyptasqan standarttan aýytqý. Meni etnıka shabyttandyrady, ulttyq taqyrypty óte jaqsy kóremin», - dep qorytyndylady sýretshi Roza Beksultanova.
Roza Beksultanovanyń «Shyǵys palıtrasy» kórmesi Almaty Gallery-de 18 sáýirge deıin jalǵasady.