Aptap ystyq alqymnan ala tústi.
Orta eseppen alsǵanda, bir Almatynyń ózinde dárigerlerge habarlasatyndardyń sany 200 adamǵa artqan, dep habarlaıdy Almaty-akshamy.kz.
Almaty.tv arnasy taratqan aqparatqa júginsek, qalypty kúnderde jedel járdem púltine 1800-ge tarta qońyraý túsedi eken. Bul – bir kúndik kórsetkish. Qazir kómek surap habarlasatyndar, orta eseppen alsaq, 2000-ǵa jetipti.
Árıne, munyń bári ystyqtan zardap kórip jatqandar emes. Degenmen "tymyrsyq aýada tynysy tarylyp, esinen tanatyndar kóp" deıdi dáriger. Al kúnniń ystyǵy júrek-qan tamyr júıesinde aqaýy barlar úshin tipten qaýipti.
«Kúnniń ystyǵy qulaqtaǵy dybysqa áser etip, bettiń qyzarýy, esinen tanyp qalý, qusýǵa deıin alyp barady. Soǵan baılanysty, shaqyrtý óte kóp. Aldyńǵy kúnderi 10-12 shaqyrtý bolsa, qazir 200-ge deıin barady. Bir kúnde bir brıgadanyń ózinde 20 shaqyrtý kelip jatyr», – dedi jedel járdem stansasynyń dárigeri Aqjan Badaev.
Jedel járdemniń kómegine júginetinderdiń kóbi – orta jastan asqan azamattar. Kún sáýlesi ótkeniniń alǵashqy belgisi retinde dárigerler sharshaý men bastyń aınalýyn atap kórsetedi. Júrek aınyǵan jaǵdaıda da qaýiptiń baryn eskergen jón.
Eskerer bir jaıt bar: kún ótkeniniń sımptomdary keıde ınsýlt pen alergıanyń belgilerine uqsaýy múmkin. Sondyqtan álsizdik bolsa, úı jaǵdaıynda em qabyldap, óz betinshe dıagnoz qoıýǵa bolmaıdy.
"Kóshede, kún astynda uzaq júrýge bolmaıdy. Kún sáýlesi tike tússe, kórý qabiletiniń buzylý qaýpi bar. Sondyqtan kózildirik, bas kıim syndy qarapaıym qorǵanys quraldaryn tastamaǵan jón. Biz aptap ystyqta appaq kıim kıý kerek ekenin jıi aıtamyz. Onyń ústine sýdy kóbirek ishken abzal. Al júrek jumysynda aqaýy bar adamdardyń múldem syrtqa shyqpaǵany durys", – deıdi jedel járdem stansasy bóliminiń aǵa dárigeri Aıgúl Ermanova.
Sınoptıkter "Almatydaǵy aptap ystyq 41 gradýsqa deıin barady" deıdi. Aldaǵy aptada baıqalatyn mundaı aýa raıy eldiń basym bóliginde saqtalmaq. Sondyqtan qarapaıym erejeniń ómir qaýipsizdigine áser etetinin umytpaǵan jón.