Almatyda 2025 jyly jańa týǵan náresteler arasynda AITV juqtyrýdyń birde-bir deregi tirkelgen joq, - dep habarlaıdy Aqshamnews.kz.
Bul mańyzdy kórsetkish júkti áıelder men shaqalaqtar arasyndaǵy AITV-nyń aldyn alý sharalarynyń tıimdiligin dáleldeıdi.
AITV-nyń tik (anadan balaǵa) juǵýynyń aldyn alý medısına qyzmetkerlerine vırýsty tıimdi baqylaýǵa, al AITV-men aýyratyn áıelderge deni saý bala týýǵa múmkindik beredi.
Qazaqstanda áıelder konsýltasıalarynda esepte turǵan barlyq júkti áıel eki ret josparly túrde tekseriledi. Bul AITV ınfeksıasyn erte anyqtap, der kezinde emdeýdi bastaýǵa jol ashady.
«Almatyda AITV-men aýyratyn barlyq júkti áıel men jańa týǵan sábıler profılaktıkalyq emmen tolyq qamtylǵan. Dárigerdiń usynystaryn qatań saqtaǵan jaǵdaıda balaǵa vırýstyń berilý qaýpi nólge deıin azaıady», - deıdi Almaty qalasy JITS-tyń aldyn alý jáne oǵan qarsy kúres ortalyǵynyń dırektory Marat Tókeev.
Vırýs júktemesi tómen áıelder ózdiginen bosana alady, al vırýs júktemesi joǵary bolǵan jaǵdaıda kesar tiligi jasalady.
Shaqalaq dúnıege kelgennen keıin birden oǵansırop túrindegi dáriler berilip, arnaıy profılaktıkalyq em taǵaıyndalady. Bala 1,5-2 jasqa deıin JITS ortalyǵy mamandarynyń baqylaýynda bolady jáne alǵashqy jylynda medısınalyq-sanıtarlyq alǵashqy kómek uıymdary arqyly tegin sút qospalarymen qamtamasyz etiledi.
Osy kezeńde bala birneshe ret AITV-ǵa tekseriledi. Eger 18 aıǵa deıingi barlyq nátıje teris bolsa, ol resmı túrde esepten shyǵarylyp, deni saý dep tanylady.
2025 jyldyń basynan bastap AITV-men perınataldyq baılanysy bar 66 bala «deni saý» dıagnozymen esepten shyǵaryldy.
Mamandar júkti áıelderdiń antıretrovırýstyq terapıany qabyldaýǵa degen jaýapkershiligi artqanyn da aıtady. Buǵan ınfeksıonıst, pedıatr, gınekolog, psıholog, ýchaskelik medbıke jáne áleýmettik qyzmetkerden quralǵan mobıldi brıgadalar jumys isteıtin kópsalaly tásildiń engizilýi áser etti. Sondaı-aq, zamanaýı antıretrovırýstyq terapıanyń tıimdiligi joǵary jańa sqemalary — táýligine bir ret qabyldanatyn biriktirilgen preparattar da mańyzdy ról atqardy.
1 jeltoqsan - Dúnıejúzilik JITS-pen kúres kúnine oraı Almatyda AITV-nyń aldyn alý jáne AITV-ǵa shaldyqqan adamdarǵa qatysty stıgmany azaıtý maqsatynda túrli aksıalar, dóńgelek ústelder, fleshmobtar men aǵartýshylyq is-sharalary ótedi.
Naýqan aıasynda «Syn-qaterden – AITV-ǵa qarsy jaýap» ataýymen naýqan aıasynda sporttyq is-shara kórermenderi, uıym qyzmetkerleri men stýdentter arasynda AITV-ǵa jedel testileýmen naýqandar ótkiziledi.
Sondaı-aq, AITV týraly mıfterdi seıiltý jáne AITV-ǵa aýyratyn jasóspirimder men jastardy qoldaý úshin jandy dıalog formatynda «VICHerınka» ınteraktıvti jastar is-sharasy ótedi.
AITV-men aýyratyn adamdar úshin dermatolog, mammolog, ftızıatr jáne onkolog mamandardyń keńesý uıymdastyrylady.
21 qarasha kúni JITS-tiń aldyn alý jáne oǵan qarsy kúres ortalyǵynda ashyq esik kúni ótedi. Onda árbir adam dárigerlerden keńes alyp, AITV-ǵa tekserile alady.